Almatyda tozyǵy jetken 2 myń shaqyrymǵa jýyq sý qubyry jelisin aýystyrý qajet
Spıkerdiń málimetinshe, qalanyń jedel qyzmetteri josparly jumystardyń ornyna kúndelikti qazý jumystaryn júrgizýge, sýmen jabdyqtaý jelilerindegi apattar men aqaýlardy joıýǵa, sodan keıin asfalttaý men abattandyrý jumystaryn júrgizýge májbúr. Káriz jelilerindegi jaǵdaı da kúrdeli.
«Búgingi tańda Almaty qalasy boıynsha sý qubyry jelileriniń tozýy – 54,2% quraıdy, ıaǵnı, 1943 shaqyrym sý qubyry jelisin aýystyrý qajet. Káriz jelileriniń 56,6%-y tozǵan, ıaǵnı, 1000 shaqyrymnan astamyn rekonstrýktsııalaý qajet. Atap aıtqanda, Talǵar sý qubyrlarynyń barlyq jelilerin, qala ishindegi magıstraldyq sý qubyrlaryn (Rysqulov, Myńbaev jáne t.b.) kezeń-kezeńimen aýystyrý qajet, Zagorodnyı jáne Býrýndaı iri káriz kollektorlarynyń tozyǵy jetken. Tozý qarqynyn tómendetý úshin jyl saıyn keminde 104 shaqyrym sý qubyry jelilerin jáne 73 km sý burý jelilerin rekonstrýktsııalaý qajet, al qoldanystaǵy ınvestıtsııalyq baǵdarlama jylyna nebári 20-25 shaqyrym qubyrdy qaıta jańartýǵa múmkindik beredi», - dedi Іlııas Qazıev.
Búgingi tańda ınjenerlik jelilerdiń tozý kórsetkishin bir qalypta ustap turý tek jańa jelilerdi salý esebinen ǵana saqtalyp tur. Kásiporynnyń jóndeý qory tolyǵymen sý jáne káriz tarıfteriniń deńgeıine baılanysty, qaladaǵy olardyń baǵasy respýblıkadaǵy eń tómengi kórsetkishterdiń biri bolyp qalýda.
Spıkerdiń málimetinshe, «Almaty qalasyn 2025 jylǵa deıin damytý baǵdarlamasy jáne 2030 jylǵa deıingi orta merzimdi perspektıvalar» aıasynda jeliler men jabdyqtardyń tozý dárejesin tómendetý maqsatynda bıyl jańa tarıftik saıasat qurylmaq.
«Investıtsııalardyń ornyna tarıfter» qaǵıdaty boıynsha tarıfterdi engizý - ınjenerlik jelilerdi ustaýǵa jáne aýystyrýǵa kóbirek qarajat jınaqtaýǵa jáne kórsetiletin qyzmetterdiń sapasyn arttyrýǵa múmkindik beredi. Kórsetilgen qyzmetter úshin aqy alýdyń ashyqtyǵyn qamtamasyz etý maqsatynda esepke alý júıesin avtomattandyrý, «Almaty – Mart Sıtı» tujyrymdamasy aıasynda negizgi kommýnaldyq kásiporyndardyń barlyq esepke alý qurylǵylaryna datchıkter ornatý qarastyrylady», - dedi І.Qazıev.
Sondaı-aq profılaktıkalyq jóndeý, qashyqtyqtan dıagnostıkalaý jáne energııa tıimdiligin arttyrý úshin zattar ınterneti ádistemesi engiziledi.
Budan bólek, turǵyndardy sý resýrstaryn únemdi paıdalanýǵa yntalandyrý úshin bıyl sý eseptegishterin ornatpaǵan tutynýshylar úshin jańartylǵan sý tutyný normalaryn engizý josparlanýda.
«Ortalyqtandyrylǵan sý qubyryna qosylýǵa qoly jetpeı júrgen turǵyndardy sýmen qamtamasyz etý maqsatynda aldaǵy jyldary Qarǵaly, Aqsaı, Ermensaı jáne Barlyq ózenderinde sý tartý qurylystary iske qosylyp, on eldi mekende 280 shaqyrym sý qubyry jelisi salynady. Bul 232 myń turǵyndy sýmen qamtýǵa jáne qalany ortalyqtandyrylǵan sýmen qamtýǵa 100% qol jetkizýge múmkindik beredi», - dedi spıker.
Іlııas Qazıev brıfıng barysynda sondaı-aq ótken jyly qalada sýmen jabdyqtaý, káriz júıesin jańǵyrtý, damytý jumystary júrgizilgenin aıtty.