Almatyda Toyota men Lexus soqtyǵysty
ALMATY. QazAqparat - Almaty ortalyǵynda Toyota men Lexus soqtyǵysty, dep habarlaıdy QazAqparat tilshisi.
Jol apaty Qazybek bı Sháripov kósheleriniń qıylysynda bolǵan. Sháripov kóshesimen soltústikke baǵyt alǵan Lexus-ty Toyota Camry kóligi kelip soqqan. Belgili bolǵandaı Toyota Camry basty kóshedegi kólikke jol bermegen.
Soqqydan Lexus kóshe jaryǵynyń baǵany men jol belgisin qırata kele jol shetine shyǵyp ketken.
Jol apatynan Camry júrgizýshisi men jolaýshysy zardap shegip, olardy jedel járdem aýrýhanaǵa alyp ketti. Lexus kóliginde qaýipsizdik qapshyǵy ashylyp, sonyń arqasynda eshkim zardap shekpedi.
Jol oqıǵasynyń mán-jaıyn polıtsııa tekserip jatyr.
