Almatyda Toyota qaǵyp ketken bala áli jansaqtaý bóliminde jatyr
ALMATY. QazAqparat - Almatyda dárigerler Toyota avtomobıli qaǵyp ketken 8-9 jastaǵy balalardyń jaǵdaıy týraly aıtyp berdi, dep habarlaıdy QazAqparat tilshisi.
Balalarǵa shuǵyl medıtsınalyq kómek kórsetý ortalyǵy bas dárigeriniń mindetin atqarýshy Dinmuhammed Rýzýddınovtyń aıtýynsha, balalar aýrýhanaǵa óte aýyr jaǵdaıda túsken.
«30 shildede keshki 19.00 shamasynda Ótegen batyr men Shalıapın kóshesimen qıylysta jol apatynan eki bala óte aýyr jaǵdaıda jetkizildi. Balalardyń jastary 8-9 aralyǵynda. Balalar qosarlanǵan jaraqatpen, mıynyń shaıqalýy, ortańǵy jiliktiń synýymen tústi. 31 shildede bireýiniń jaǵdaıy jaqsaryp, bólimshege aýystyryldy. 1 tamyzda balanyń ortan jiligine ota jasaldy. Bala esin jıǵan, travmatologııa bólimshesinde em qabyldap jatyr. Ekinshi balanyń jaǵdaıy óte aýyr. Qazir ol jansaqtaý bóliminde emdelip jatyr», - dedi Dinmuhammed Rýzýddınov.
Aıta ketý kerek, oqıǵa 30 shilde kúni Shalıapın men Ótegen batyr kósheleriniń qıylysynda bolǵan edi. Toyota kóligi kósheni kesip ótpek bolǵan eki balany qaǵyp ketken.
