Almatyda «ToıQazan» festıvali aıasynda tuńǵysh ret án baıqaýy ótkiziledi
ALMATY. QazAqparat- Bıyl 4 qyrkúıekte Almaty irgesindegi «Medeý» sport kesheninde qazaq halqynyń ulttyq taǵamdarynyń áıgili «ToıQazan 2016» festıvali ótkiziledi. Almaty qalasynyń 1 000 jyldyǵyna arnalǵan bul festıval aıasynda tuńǵysh ret «ToıQazan Daýysy» án baıqaý uıymdastyrylmaq.
Sonymen qatar, festıval barysynda sporttyq, oıyn-saýyq jáne tanymdyq sıpattaǵy baıqaýlar, jarystar, oıyndar jáne basqa da merekelik sharalar ótkiziledi.
«Bıyl festıval «Medeý» bıiktaýly sport kesheninde bolady. Bul biz úshin úlken emtıhan ispettes. Óıtkeni, «Medeý» - kezinde «Azııa daýysy» sekildi halyqaralyq deńgeıdegi sharalar ótkizilgen alań. Bıyl festıval aıasynda «ToıQazan Daýysy» atty án baıqaýyn uıymdastyramyz. Oǵan án aıtýǵa qumar jandaryń barlyǵy qatysa alady. Al, olardyń sheberlik deńgeıin kásibı óner maıtalmandary baǵalaıdy», - dedi festıvaldiń negizin qalaýshylardyń biri, belgili kásipker Erlan Stambekov.
Sondaı-aq, bul kúni munda Qazaqstannyń opera jáne estrada juldyzdary -Maıra Muhamedqyzy, Súndet Baıǵojın, ataqty «Dos-Muqasan» toby, Medeý Arynbaev, Gýlıa Tólegenova, Jámılá Serkebaeva jáne basqa da ánshilerdiń qatysýymen kontsert ótedi.
Festıval aıasynda osy festıvaldiń ánurany oryndalady. Onyń sózin avtorlyq birlestikte Erlan Stambekov pen Vasılıı Gavrılıdı, al mýzykasyn Ádil Janbakıev jazǵan. 
