Almatyda toıhana halyqqa qyzmet kórsetý ortalyǵyna aınaldy

ALMATY. QazAqparat- Almaty qalasyndaǵy úlken toıhananyń biri mamandandyrylǵan halyqqa qyzmet kórsetý ortalyǵyna aınaldy, dep habarlaıdy QazAqparat tilshisi.

Onyń vıdeosy áleýmettik jelide paıda boldy.

«Qulja tasjolyndaǵy meıramhanalardyń biri halyqqa qyzmet kórsetý ortalyǵyna aınaldy. Toıhana endi ózekti emes sııaqty», - deıdi vıdeo avtory.

«Azamattarǵa arnalǵan úkimet» buǵan deıin mamandandyrylǵan №5 HQO Jetisý bazarynyń ǵımaratynda jumys istegenin jetkizdi.

Ǵımarat eski jáne talapqa saı bolmaǵandyqtan tutynýshylardan shaǵym kóp túsken.

Sondyqtan Qulja tasjolynyń boıynda ornalasqan yńǵaıly ǵımaratqa kóshirý týraly sheshim qabyldandy.

«Jańa ǵımarattyń 200 kólikke arnalǵan turaǵy bar. Barlyq sanıtarlyq talaptar men normalarǵa saı. Múmkindigi shekteýli adamdarǵa arnalǵan pandýs bar. Aıta ketý kerek, ǵımarat tegin jalǵa beriledi, fılıal tek kommýnaldyq shyǵyndardy óteıdi»,- dep habarlady memlekettik korporatsııanyń baspasóz qyzmeti.