Almatyda toıdan qaıtqan jastar eki polıtseıdi qaǵyp ketti
ALMATY. QazAqparat - Almatyda eki polıtsııa qyzmetkerin qaǵyp ketken toı kortejiniń júrgizýshileri ustaldy, dep habarlaıdy QazAqparat tilishisi qalanyń PD baspasóz qyzmetine silteme jasap.
Ákimshilik polıtsııa basqarmasynyń jol-patrýl polıtsııa bólimshesiniń mamandandyrylǵan batalon qyzmetkerleri ál-Farabı dańǵylynda jol erejesin buzǵan toı kortejin kórdi. Júrgizýshilerdi toqtatýdyń alǵashqy áreketi Jarokov kóshesiniń qıylysynda boldy. Alaıda, olar ınspektorlardyń talabyn elemedi. Jol qozǵalysy erejesin buzǵandar shyǵys aınalma jolynda toqtatyldy. Biraq, buzaqylar boı bermedi.
«Toyota Camry» avtokóliginiń júrgizýshisi polıtsııa leıtenanty Maqsat Kılybaevty qaǵyp ketti. Abyroı bolǵanda, polıtseı jeńil dene jaraqatyn aldy. Osy kezde kortejdegi «Lada Prıora» kóliginiń júrgizýshisi polıtsııa kapıtany Jandos Buǵalovty qaǵyp, kóligin bar jyldamdyqpen júrgizip, qashýǵa árekettendi. Jaraqattanǵan ınspektor bar kúshin jınap ornynan turyp, kóliktiń sońynan qýdy.
«Saharıev kóshesinde ol kortejdegi úsh kóliktiń qozǵalysyn toqtatty. Kóliktiń ishi jastarǵa toly. Olar «Qyz uzatý» toıynan kele jatyr eken. Aralarynda qalyńdyq ta bar», - deıdi Almaty PD ákimshilik polıtsııa basqarmasynyń bastyǵy Jandos Muratalıev.
«Toyota Camry-70» kóligin 1996 jyly týǵan A.B. Mamytjanov júrgizgen. Oǵan qarsy 2 ákimshilik hattama toltyryldy. «Lada Prıora» avtokóliginiń júrgizýshisi 1998 jyly týǵan E.M. Hamzaǵa birneshe quqyq býzýshylyq boıynsha aıyp taǵylyp, 4 hattama toltyryldy. «Toyota Camry-30» avtokóligin basqarǵan A.J Ýashevtyń atyna da 4 ákimshilik hattama toltyryldy.
Sondaı-aq, eki avtokólik júrgizýshisi polıtsııa qyzmetkerlerin qaǵyp ketkeni úshin zań aldynda jaýap beredi.
Avtor: Alma Muqanova
