Almatyda toı kortejiniń quramynda jol qozǵalysy erejesin buzǵan kólik júrgizýshileri jaýapqa tartyldy
ALMATY. QazAqparat - Almatyda toı kortejiniń quramynda jol qozǵalysy erejesin óreskel buzǵan kólik júrgizýshileri jaýapqa tartyldy. Bul týraly búgin Almaty q. ІІD baspasóz qyzmetinen habarlady.
«Buǵan deıin málim bolǵanyndaı, polıtsııa qyzmetkerleri jol qozǵalysy erejesin óreskel túrde buzǵan nekelik sherýge qatysýshylardy jaýapqa tartty. Esterińizge sala ketelik, 2015 jyldyń 7-shi qarashasy kúni keshki saǵat bestan asqan ýaqytta Baızaqov kóshesiniń shyǵys jaǵyna taman, Abaı dańǵyly boıynda neke sherýi tarapynan jol qozǵalysy erejesi buzyldy», - delingen habarlamada.
Polıtsııa qyzmetkerleri osy sherýge qatysty beınetaspany muqııat saraptaı kele, ondaǵy avtokólik júrgizýshileriniń barlyǵynyń aty-jónderin anyqtady. Búgingi tańda barlyq tórt avtokólik júrgizýshisi jol qozǵalysy erejesin buzǵandary úshin ákimshiilik jaýapqa tartyldy.
Naqty aıtar bolsaq:
1. «Toıota Foraner» avtokóliginiń júrgizýshisi N. Súıinbaı QR Ákimshilik quqyq buzýshylyq kodeksiniń 596-shy babynyń 3-shi tarmaǵy boıynsha (qarsy jolaqqa shyǵyp ketý) - 1 jyl merzimge kólik júrgizý quqyǵynan aıryldy.
2. «Toıota Lend Krýzer» avtokóliginiń júrgizýshisi N. Narbaevqa QR Ákimshilik quqyq buzýshylyq kodeksiniń 601-shi babynyń 1-shi tarmaǵy boıynsha (qoıylǵan belgilerge qatysty ereje buzý) - 5 AEK kóleminde aıyppul salyndy.
3. «Mersedes Bents» avtokóliginiń júrgizýshisi Baıbatyr E. QR Ákimshilik quqyq buzýshylyq kodeksiniń 595-shi babynyń 1-shi tarmaǵy (artqa qaraı júrý), 595-shi babynyń 1-shi tarmaǵy (manevr jasaý erejesin buzý) jáne 606-shy babynyń 1-shi tarmaǵy boıynsha (apatty jaǵdaı týǵyzý) - 15 AEK kóleminde aıyppul salyndy.
4. «Mersedes Bents» avtokóliginiń júrgizýshisi Sarkısıan A. QR Ákimshilik quqyq buzýshylyq kodeksiniń 95-shi babynyń 1-shi tarmaǵy boıynsha (manevr jasaý erejesin buzý) 5 AEK kóleminde aıyppul salyndy.
