Almatyda tótenshe jaǵdaılarda SMS-habarlandyrýdyń tıimdiligi tómen - TJD
ALMATY. QazAqparat – Almaty qalalyq TJD tótenshe jaǵdaılardan, ásirese jer silkinisinen SMS habarlandyrý tásiliniń tıimdiligi tómen ekenin málimdedi, dep habarlaıdy QazAqparat tilshisi.
Qalalyq TJ basshysy Serik Áýbákirovtiń aıtýynsha, qala turǵyndary bul habarlandyrý qyzmetinen bas tartqan.
«Biz kóp jyldar boıy tótenshe jaǵdaı bolǵan jaǵdaıda halyqqa SMS habarlandyrý júıesin qoldanyp keldik. Biraq, bul júıeniń tıimsiz ekeni anyqtaldy. Almatylyqtarǵa SMS habarlamanyń kelý algorıtmi unamady. Sebebi, bul habarlamany uıaly baılanys operatorlary jiberedi. Qalada 2 mln adam turatynyn eskersek, SMS habarlamalar lek-legimen jetkenshe uzaq ýaqyt ketedi. Keıbir turǵyndar bundaı habarlamany jer silkinisinen soń 5-6 saǵattan soń alyp jatady. Qazir bizde odan tıimdirek Darmen qosymshasy iske qosyldy», - dedi Serik Áýbákirov.
Onyń aıtýynsha, Darmen qosymshasynda jańa seısmıkalyq datchıkter iske qosylady.
«Eger ár dúmpý tolqyny 100 shaqyrymda 8-10 sekýndta taraıdy desek, 200 shaqyrym bolatyn epıtsentrdi alyp tastaǵanda siz habarlamany 18-20 sekýndta alasyz. 20 sekýndta adam ózi sheshim qabyldap úlgeredi», - dedi Serik Áýbákirov.
