Almatyda tótenshe jaǵdaı jarııalanǵaly beri órt sóndirýshiler qansha adamdy qutqardy
Bul týraly qalalyq Tótenshe jaǵdaılar departamentiniń bastyǵy Rýslan Qasybaev málim etti, dep habarlaıdy QazAqparat tilshisi.
Rýslan Qasybaevtyń aıtýynsha, órtengen nysandardy tolyqtaı sóndirýge múmkindik bolǵan joq, sebebi, órt sóndirý barysynda jeke quramǵa bandalyq qurylymdar shabýyl jasaǵan.
«Degenmen, órt sóndirý operatsııalarynyń kóbi sátti ótti. TJD qyzmetkerleri 28 adamdy qutqardy, 125 adamdy evakýatsııalady», - dedi ol.
TJD bastyǵynyń málimetine sáıkes, 4 qańtardan bastap búginge deıin «112» men «101» pýltterine 59 myńnan astam qońyraý kelip túsken. Adamdardyń kóp jınalý, tonaýshylyq, qalanyń qandaı da bir aýdanynda kúdikti adamdar, avtokólikterdiń nómirsiz júrý faktileri boıynsha barlyq habarlamalar shtabqa jiberildi.
TJD basshysy atap ótkendeı, turǵyndardy terrorızmge qarsy operatsııa týraly qulaqtandyrý maqsatynda qalada kún saıyn teleradıo habarlar taratylyp, komendanttyq saǵattyń bastalǵany týraly dabyl berildi, uıaly operatorlardyń abonentterimen SMS-habar taratyldy. Halyqty habarlandyrý jumystary búginde de jalǵasýda.
Jappaı tártipsizdik kezinde Órt sóndirý qyzmetiniń 8 qyzmetkeri zardap shekti. Olardyń biri órt sóndirý mashınasyn keri qaıtaryp alýǵa árekettengen kezinde qolyna oq tıip, jaraqattandy. Barlyǵy 18 birlik tehnıka zaqymdandy, 6-tehnıka basyp alyndy, onyń 5-ýi órtendi jáne 1-ýi keri qaıtaryldy, 12 tehnıkaǵa zaqymdansa, 1 tehnıkaǵa oq tıgen.
«Órt sóndirýshiler úzdiksiz shabýyldarǵa ushyraǵanyna qaramastan, azamattar bizdiń bólimshelerge kómek kórsetip jatty. Azamattyq qorǵaý organdaryna buryn bolmaǵan tótenshe jaǵdaı rejıminde jumys isteýge týra keldi. Biraq, óziniń joǵary jaýyngerlik rýhy men jeke quramnyń úılesimdi jumysynyń arqasynda qyzmet talapqa saı oryndaldy jáne bul baǵyttaǵy jumystardy aldaǵy ýaqytta da jalǵastyramyz», - dep túıindedi Rýslan Qasymbaev.
