Almatyda tótenshe jaǵdaı rejimin buzǵan vaıner Zheka_Fatbelly aıyppul tóleıdi
ALMATY. QazAqparat – Almaty polıtsııasy «Zheka_Fatbelly» esimdi belgili vaınerdi tótenshe jaǵdaı rejimdi buzǵany úshin ákimshilik jazaǵa tartty, dep habarlaıdy QazAqparat tilshisi.
Almaty polıtsııasy tótenshe jáne karantındik rejımderdi saqtaý aıasynda áleýmettik jelige monıtorıng júrgizgen.
«Tájirıbe kórsetkendeı, keıbir vaınerler, blogerler jáne jeliniń belsendi qoldanýshylary karantındi buzǵan. Sonymen qatar, olar muny kópshilikke jarııa jasaǵan. Osylaısha, olar zańdar men qaýipsizdik sharalaryna elemegin. Eger olardyń árqaısysynyń úlken aýdıtorııasy bar ekenin eskeretin bolsaq, «jaman ádet» basqalarǵa da úlgi bolýy múmkin», - deıdi, Almaty qalalyq PD Jergilikti polıtsııa qyzmeti basqarmasynyń bastyǵy Manap Sattarov.
Olardyń biri - jelide «Zheka_Fatbelly» laqap atymen tanymal Jeńis Omarov.
Ol QR ÁQbK-niń 476-baby boıynsha ákimshilik jaýapkershilikke tartyldy. Oǵan sot sheshimimen 10 AEK mólsherinde aıyppul salyndy.
«Qurmetti qazaqstandyqtar! Men, 2020 jyldyń 20 sáýirinde tótenshe jaǵdaı, karantın rejımin buzdym. Men dosymdy úıge kirgizdim, ol maǵan shash úlgisin jasady. Men ony beınekameraǵa túsirip, ǵalamtorǵa salyp jiberdim. Men óz kinámdi moıyndaımyn. Karantın rejımin saqtaýyńyzdy suraımyn», – dep keshirim surady Jeńis Omarov.
Eske sala ketsek, munyń aldynda belgili ánshi Arman Qońyrbaev ta karantın rejimin buzǵany úshin jaýapkershilikke tartylǵan bolatyn.
