Almatyda tórt azamattan eki travmatıkalyq tapansha, oq-dáriler men pyshaq tárkilendi

ALMATY. QazAqparat- Almatylyq polıtseıler tórt azamattan travmatıkalyq tapansha men oq-dárilerdi tárkiledi, dep habarlaıdy QazAqparat tilshisi.

Medeý aýdandyq polıtsııa basqarmasynyń bastyǵy Іlııas Ómirserikov.

Medeý aýdandyq polıtsııa basqarmasynyń bastyǵy Іlııas Ómirserikovtyń aıtýynsha, Nazarbaev dańǵyly men Sátbaev kóshesiniń qıylysynda polıtsııa qyzmetkerleri BMV kóligin toqtatqan.

Tártip saqshylaryna kólik ishinde otyrǵan tórt er adamnyń is-áreketi kúdikti bolyp kóringen.

«Kólik quralyn tekserý barysynda bagajdan 2 travmatıkalyq tapansha men olarǵa arnalǵan oqtar tabyldy jáne tárkilendi. Osy ýaqytta kúdiktilerdiń birinen taǵy bir travmatıkalyq tapansha, oqtar men pyshaq tabylyp, tárkilendi. Atalǵan derek boıynsha QR QK-niń 287-baby 2-bóligine (Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý) sáıkes qylmystyq is tirkelip, tergeli jatyr», – dedi Medeý aýdandyq polıtsııa basqarmasynyń bastyǵy Іlııas Ómirserikov.

Polıtsııa ókili qarýdyń kimge tıesili ekendigi sotqa deıingi tergeý barysynda anyqtalatynyn aıtty.