Almatyda tońazytqysh ishinen 2 búldirshinniń denesi tabyldy
ALMATY. QazAqparat - Almatydaǵy jaldamaly páterlerdiń birinen tońazytqysh ishinen eki balanyń múrdesi tabyldy, dep habarlaıdy QazAqparat tilshisi qalalyq ІІD resmı ókili Saltanat Ázirbekke silteme jasap.
Qalalyq ІІD resmı ókili qaıǵyly jaıttyń oryn alǵanyn rastady.
Onyń aıtýynsha, Túrksib aýdanyndaǵy jaldamaly páterlerdiń birinde tońazytqyshtan ıistene bastaǵan 1,5 jáne 4 jastaǵy eki balanyń denesi tabylǵan.
Kórshileri habarlaǵandaı, buǵan deıin bul páterdi úsh balasy bar áıel jaldap turǵan.
Áıeldiń ózi 1 jastaǵy balasymen qaıda ketkeni belgisiz.
«Qazir atalǵan derek QR Qylmystyq kodeksiniń 99-baby boıynsha sotqa deıingi tergeý isi tizilimine tirkelip, sot aldy tergeý amaldary júrgizilip jatyr. Budan basqa aqparat tergeý qupııasyna baılanysty jarııa etilmeıdi», - dedi Saltanat Ázirbek.
