Almatyda tonaýshylyqpen aınalysqan top ustaldy
ALMATY. QazAqparat - Almatyda tonaýshylyqpen aınalysty degen kúdikpen 5 adam ustaldy. Bul týraly QazAqparat tilshisine qalalyq ІІD baspasóz qyzmetiniń jetekshisi Saltanat Ázirbek aıtty.
Qylmystyq top músheleriniń eń úlkeni - 22, eń kishisi - 18 jasta. Olardyń barlyǵy Almaty jáne Shymkent oblystarynyń týmalary ekendigi anyqtaldy. «Qazir atalǵan tulǵalardyń barlyǵy tonaýshylyqpen ári qaraqshylyq shabýylmen aınalysqandaryn moıyndap otyr. Anyqtaý jumystarynyń nátıjesinde olardyń Jetisý aýdanyndaǵy 5-6 tonaýshylyq qylmysqa qatysy bar ekendigi anyqtaldy. Endi Túrksib aýdanyndaǵy qylmystarǵa qatystarynyń bar-joǵy tekserilip jatyr», - dedi ІІD baspasóz qyzmetiniń jetekshisi Saltanat Ázirbek. Búgingi tańda kúdiktiler ýaqytsha ustaý oqshaýlaǵyshyna qamaldy, atalǵan derek boıynsha tergeý jumystary júrgizilýde.
