Almatyda tonaýmen aınalysqan 17 toptyń, 65 qaraqshylyq shabýyldyń joly kesildi

ALMATY. QazAqparat – 2022 jyldyń qorytyndysy boıynsha Almatyda qylmys sany azaıǵan. Bul týraly qalalyq polıtsııa departamentiniń bastyǵy, polıtsııa general-maıory Arystanǵanı Zapparov aıtty, dep habarlaıdy QazAqparat tilshisi.

Almatynyń bas polıtseıi habarlaǵandaı, qylmystyq quqyq buzýshylyqtyń jalpy ashylýy jaqsardy. Mas kúıde jasalǵan zańsyz áreketter sany 17,3%-ǵa, qoǵamdyq oryndardaǵy zańsyzdyq 4,1%-ǵa azaıǵan.

«Departamenttiń jeke quramy shaharda tıisti qoǵamdyq tártipti qamtamasyz etip, qaladaǵy qylmysty azaıtý úshin barlyq qajetti sharalardy qabyldap jatyr. Nátıjesinde tonaýmen aınalysqan 17 toptyń, 65 qaraqshylyq shabýyldyń, 13 kólik urlyǵynyń, 33 páter urlyǵymen aınalysqandardyń, 20 avtokóliktiń ishin tonaǵan, 159-y qoǵamdyq orynda jeke múlikti urlaǵandardyń qylmystyq joly kesildi», - dedi Almaty qalalyq polıtsııa departamentiniń bastyǵy.

Ol sondaı-aq, qalada zorlaý qylmysy 3,4%-ǵa, páter urlyǵy 6,5%-ǵa, qalta urlyǵy 2,6 ese, kóliktiń salonynan urlyq 2,3 ese, ınternettegi alaıaqtyq 28,4%-ǵa azaıǵanyn aıtty.