Almatyda tomoterapııa ortalyǵy ashyldy

ALMATY. QazAqparat - Saltanatty is-sharalarǵa Qazaqstan Respýblıkasy Syrtqy ister mınıstrliginiń, Qazaqstan Respýblıkasynyń Túrkııadaǵy elshisiniń, «Kazakh Invest» UK» AQ, «Almaty» áleýmettik-kásipkerlik korporatsııasy» AQ («Almaty» ÁKK), Almaty ındýstrıaldy aımaǵynyń ókilderi, sheteldik ınvestolar qatysty, dep habarlaıdy QazAqparat tilshisi.

Onkologııa jáne radıologııa ınstıtýtynyń ǵımaratynda ashylǵan Tomoterapııa ortalyǵynda jylyna 12 myń sáýleli terapııa seansyn ótkizý múmkindigi bar.

Onyń ınvestory «Orhun Medical» JShS (Túrkııa) atynan ortalyq qurylysyna 2,7 mlrd teńge salyp otyrady.

Jobanyń operatory - «Alma Medical Group». Investıtsııalyq joba 70 jumys ornyn qurýǵa múmkindik beredi.

Ári qaraı delegatsııa «Almaty» ÁKK kompanııasynyń tobyna kiretin ındýstrıaldy aımaǵynyń aýmaǵynda eki jańa zaýyt qurylysynyń qurmetine kapsýla salý is-sharasyna qatysty.

«CELKONSAN Stroy» JShS (Túrkııa) metall qorshaýlarynyń óndirisi boıynsha zaýyty 2023 jyly paıdalanýǵa beriledi dep josparlanýda.

Jobanyń quny - 1,5 mlrd teńge. Ol paıdalanýǵa berilgen soń 25 jańa jumys orny ashylmaq. Kásiporynnyń qýaty - jylyna 12 myń tonna jol qorshaýy men 15 myń tonna ystyqtaı myryshtalǵan buıym.

«Panelsan» sendvıch-panelderin óndiretin zaýyt («Almaty Sendvıch-Panel» JShS) jylyna 1 mln sharshy metrge deıin ónim shyǵarýǵa nıettenip otyr.

Jobanyń quny – 3,7 mlrd teńge. Shamamen 100 jumys orny ashylady dep kútilýde.

«Sońǵy birneshe kún ishinde biz Qazaqstanda 7 jańa túrik jobasyn, onyń ishinde, búgin Almatyda eki zaýytty iske qosamyz. Bizdiń elimiz Túrkııamen tyǵyz baılanys jasap otyr, ol - Qazaqstannyń iri ınvestorlarynyń biri. Búginde bizdiń respýblıkada túrik kapıtaly bar shamamen 3,5 myń kompanııa belsendi jumys isteýde. Túrkııadan Qazaqstanǵa kelip túsetin tikeleı ınvestıtsııa kólemi búginde 350 mln AQSh dollaryn quraıdy. Bul deńgeı pandemııaǵa qaramaı, ótken jyly da turaqty boldy. Túrik ınvestorlarynyń arasynda shaǵyn jáne orta kompanııalar kóp. Atalǵan eki zaýyt qurylysynyń mańyzy bizdiń qurylys salamyzdyń ósýimen túsindiriledi. Mysaly, ótken jyly Qazaqstan shamamen 15 mln. sharshy metr jańa alańdy engizdi, al osy jyly 17 mln sharshy metr engizýdi josparlap otyr. Bul rette, ózimiz óndiretin qurylys materıaldary bizde jetkiliksiz. Mysaly, Qazaqstanda, ázirge jańa tehnologııa boıynsha shyǵarylatyn sendvıch-panelder óndirilmeıdi. Atalǵan zaýyttardyń qurylysy qurylys materıaldarynyń qunyn tómendetýge múmkindik beredi», – dedi Qazaqstan Respýblıkasy Syrtqy ister mınıstriniń orynbasary Almas Aıdarov.

Almaty ákimdiginiń málimetinshe, búginde Qazaqstanda Túrkııa ınvestorlarynyń qatysýymen 50-den astam ınvestıtsııalyq joba tabysty iske asty.

Bul rette joǵaryda atalǵan ınvestıtsııalyq jobalardy iske asyrý sheńberinde túrik áriptesterge jan-jaqty kómekti Almaty qalasy ákimdiginiń, «Almaty» ÁKK jáne Qazaqstan Respýblıkasy Syrtqy ister mınıstrligi, Qazaqstan Respýblıkasynyń Túrkııadaǵy elshisi, «Kazakh Invest» UK» AQ jáne Almaty ındýstrıaldy aımaǵynyń atynan jergilikti atqarýshy organdar kórsetti.