Almatyda tólem termınaldaryn tonaǵan qylmystyq top ustaldy
ALMATY. QazAqparat – Almatyda tólem termınaldaryn tonaǵan qylmystyq top qolǵa tústi, dep habarlaıdy QazAqparat tilshisi.
Almaty polıtsııasy megapolıstegi aýdandarynyń birinde arnaıy operatsııa júrgizdi. Nátıjesinde iri dúkenderdiń kireberisinde ornatylǵan tólem termınaldaryn buzyp, sol jerden aqsha urlaǵan eki er adam ustaldy.
«Qylmyskelerdiń izine túsý úshin aldymen keshendi izdestirý sharalary uıymdastyryldy. Kúdiktiler - 31 jastaǵy N. jáne 32 jastaǵy Sh. esimdi azamattar. Ekeýi de buryn múliktik qylmysy úshin sottalǵan. Tergeý barysynda olardyń termınaldardy buzý jáne sol jerden aqsha urlaýdyń toǵyz epızodyna qatysy bar ekendigi dáleldendi. Qazirgi ýaqytta QR QK 188-baby boıynsha sotqa deıingi tergeý júrip jatyr. Ustalǵandar ýaqytsha ustaý ızolıatoryna qamaldy. Tergeý jalǵasyp jatyr», - dedi Almaty qalalyq PD basshysynyń orynbasary Berik Ábilbekov.
Spıkerdiń aıtýynsha, kúdiktiler adamdar kóptep baratyn dúkender men saýda úılerge ornatylǵan termınaldardy tonaǵan. Satýshylar klıentterge qyzmet kórsetýmen aınalysyp jatqanda, urylar birneshe mınýt ishinde tólem termınaldaryndaǵy aqshany úptep ketetin bolǵan.
