Almatyda toǵyzynshy «Halyqaralyq djaz merekesi» festıvali ótedi

Bul jaıynda búgin ótken baspasóz máslıhatynda aıtyldy, dep habarlaıdy QazAqparat.

Sharany Tagır Zarıpovtyń basqarýyndaǵy djaz mektebi, Almaty qalasy ákimdiginiń qoldaýymen qalalyq bilim basqarmasy, Shveıtsarııa, Túrkııa, Frantsııa, Avstrııa elshilikteri men Gete- ınstıtýty uıymdastyrýda.

Atalmysh festıvaldiń maqsaty - qazaqstandyqtardy álemdik djaz mýzykasy juldyzdarymen tanystyrý jáne sheteldik mamandardyń sheberligi arqasynda jergilikti mýzykanttardyń odan ári damýyna múmkindik jasaý. Sonymen qatar balalarǵa mýzykalyq sapaly bilim berý, sheteldik mýzykanttarmen otandastarymyz arasynda baılanys ornatyp, djazdy keńinen nasıhattaý.

Dástúrli festıvaldi T.Zarıpovtyń basqarýyndaǵy «Almaty Youth Jazz band» orkestry ashady. Osy jylǵy sharaǵa Shveıtsarııa, Germanııa, Túrkııa, Qyrǵyzstan, Avstrııa, Frantsııa jáne Qazaqstan toptary qatyspaq.

Frantsııa Elshiliginiń bilim jónindegi attashesi Ioan Shıttererdiń aıtýynsha, qazaqstandyq djaz-festıval úlken abyroıǵa ıe, óıtkeni jyl saıyn oǵan qatysýshylar men qonaqtardyń sany ósýde. «Djaz - bul barlyq jerde tyńdalatyn mýzyka. Bıyl almatylyqtar men onyń qonaqtaryn tań qaldyramyz degen úmitpen Frantsııadan «Clip! La Lune!» toby kelip otyr», dedi I.Shıtterer.