Almatyda TMD elderiniń pedıatrlary balalardyń densaýlyǵyn qorǵaýdy jetildirý máselelerin talqylaýda
Sharany QR Densaýlyq saqtaý jáne áleýmettik damý mınıstrligi Pedıatrııa jáne balalar hırýrgııasy ǵylymı ortalyǵy men Qazaqstan pedıatrlarynyń odaǵy uıymdastyryp otyr.
Forým qatysýshylarynyń aldynda sóz sóılegen QR DSÁDM Medıtsınalyq jáne farmatsevtıkalyq qyzmetti baqylaý komıteti basshysynyń orynbasary Roza Qýanyshbekova sezd ótkizilgennen beri 4 jylda Qazaqstanda balalardyń densaýlyǵyn qorǵaý deńgeıin arttyrý boıynsha aıtarlyqtaı nátıjelerge qol jetkizilgenin atap aıtty. Dıagnostıkalaý men emdeýdiń joǵary tehnologııaly, zamanaýı tásilderi engizilip, pedıatrlyq jáne t.b. baǵyttaǵy medıtsınalyq kadrlaryn daıyndaý protsesi jetildirildi.
«Memleket basshysy óziniń «Qazaqstan-2050» strategııasy - qalyptasqan memlekettiń jańa saıası baǵyty» atty Qazaqstan halqyna Joldaýynda ana men balany qorǵaý - jańa kezeńdegi áleýmettik saıasattyń mańyzdy quramdas bóligi ekenin málimdegen bolatyn. Atalǵan baǵyttardy iske asyrý ana men balaǵa kórsetiletin medıtsınalyq kómekti ári qaraı aımaqtandyrýǵa, balalarǵa keshendi medıtsınalyq jáne áleýmettik kómek kórsetýge negizdelgen bosandyrý men balalar qyzmetteriniń biriktirilgen úlgisin engizý arqyly júzege asyrylady», - dedi Roza Qýanyshbekova.
Ol atalǵan baǵytta kórsetiletin medıtsınalyq kómektiń óz baǵdary aıasynda barlyq deńgeıde tıimdilik pen sapany qamtamasyz etý, baqylaý boıynsha respýblıkalyq emhanalardyń, ǵylymı ortalyqtardyń, ǵylymı-zertteý ınstıtýttarynyń jaýapkershiligi kúsheıtilgenin atap aıtty.
«Sonymen qatar, ǴZI ǵalymdary da aımaqtardaǵy medıtsınalyq qyzmetkerlerge halyqpen jumys isteýde (tipti aýdan deńgeıinde) qajetti konsýltatıvtik, ádistemelik, jáne praktıkalyq kómek kórsetedi», - dep habarlady QR DSÁDM ókili.
Plenarlyq otyrysta bala jáne náreste ólimin ári qaraı tómendetý; perınataldy patologııalardy emdeý men onyń dıagnostıkasy, profılaktıkasy; alǵashqy medıtsınalyq-sanıtarlyq medıtsınalyq kómek deńgeıindegi balalarǵa kórsetiletin medıtsınalyq kómektiń nátıjeliligi men sabaqtastyǵyn, sapasyn arttyrý; hırýrgııalyq patologııalary bar balalarǵa kórsetiletin medıtsınalyq kómektiń joǵary tehnologııalyq jańa túrlerin engizý; pedıatrııalyq ǵylymdy damytý jáne balalar men reprodýktıvti jastaǵy áıelderdiń densaýlyǵyn qorǵaý qyzmetine ınnovatsııalyq tehnologııalardy engizý, elimizdiń JOO-da pedıatrııalyq kadrlardy daıarlaý jáne t.b. talqylandy.
Búgin paneldik sektsııalarda balalar gemotologııasy, onkologııasy men ımmýnologııasynyń, revmotologııa, kardıologııa men balalar hırýrgııasynyń, tynys alý músheleri men zat almasýdyń týabitti patologııasy máseleleri qarastyrylatyn bolady.
Sezd aıasynda QR Ulttyq ǵylym akademııasynyń akademıgi Kamal Ormantaevty 80 jyldyq mereıtoıymen quttyqtaý josparlanyp otyr. Ol tek balalar hırýrgııasyna ǵana emes, elimizdiń barlyq pedıatrııalyq qyzmetine baǵa jetpes úles qosty.
Sonymen birge, zamanaýı dárilik zattar men balalar taǵamynyń, medıtsınalyq maqsattaǵy buıymdar, jańa aqparattyq jáne medıtsınalyq tehnologııalar jármeńkesi ótkiziledi.