Almatyda TMD elderinde teńdesi joq Jattyǵý daǵdylary ortalyǵy ashyldy
ALMATY. 16 qyrkúıek. QazAqparat /Erlik Erjanuly/ - Búgin Almatydaǵy Sanjar Asfendııarov atyndaǵy Qazaq ulttyq medıtsına ýnıversıtetiniń tarıhynda jańa bet ashyldy.
Ony ýnıversıtet rektory Aıqan Aqanov Qasen Qojaqmetov atyndaǵy Jattyǵý daǵdylary ortalyǵynyń ashylý rásiminde aıtty. TMD elderinde teńdesi joq biregeı bul ortalyq burynǵy rektorat ǵımaratynda ornalasqan. Onyń jóndeý jumystaryna ǵana 1,5 mıllıon dollardan astam qarjy jumsalyp otyr.
"Buǵan deıin bizdiń stýdentterdiń tájirıbelik daǵdylary tómen bolyp kelgen edi. Endi osy olqylyqtyń orny tolatyn boldy. Bizdiń áleýetimizdi kórgen Bilim jáne ǵylym mınıstri taıaý kúnderi joǵary oqý ornyna ınovatsııalyq ýnıversıtet mártebesin beretin boldy. Buǵan akademık Tóregeldi Sharmanovtyń qosqan úlesi óte zor", - deıdi Aıqan Aqanuly. Onyń sózine qaraǵanda, S. Asfendııarov atyndaǵy QazUMÝ-ǵa ǵylymı zertteý taqyryptaryna qazirdiń ózinde 500 mıllıon teńge bólinip otyr.
Jalpy Qasen Qojaqmetov atyndaǵy Jattyǵý daǵdylary ortalyǵy qurylymyna - Kommýnıkatıvti daǵdylar ortalyǵy; Medıtsınalyq sımýlıatsııa ortalyǵy; "Stomatologııa", "Farmatsııa" mamandyqtary boıynsha daǵdylar ortalyqtary; Medıtsınalyq-saýyqtyrý isi daǵdylary ortalyǵy, OSKE ortalyǵy (Bilim men daǵdylardy táýelsiz baǵalaý) enip otyr.
