Almatyda TMD elderi qaýipsizdik organdarynyń otyrysy ótti

ALMATY. QazAqparat - Almaty qalasynda Táýelsiz Memleketter Dostastyǵyna múshe memleketterdiń qaýipsizdik organdary men arnaýly qyzmetteri basshylary keńesiniń 45-otyrysy ótti, dep habarlaıdy QazAqparat QR UQK baspasóz qyzmetine silteme jasap.

Іs-sharaǵa Ázerbaıjan MQQ, Armenııa UQQ, Belarýs MQK, Qazaqstan UQK, Qyrǵyzstan MUQK, Reseı FQQ, Tájikstan MUQK jáne Ózbekstan MQQ basshylary bastaǵan delegatsııalar qatysty.

Odan basqa, shaqyrylǵan qonaq retinde Ázerbaıjan, Qazaqstan jáne Reseı Syrtqy barlaý qyzmetteriniń, sondaı-aq TMD Atqarý komıteti men TMD-ǵa múshe memleketterdiń Terrorǵa qarsy ortalyǵynyń ókilderi qatysty.

Dostastyq elderi qaýipsizdik organdarynyń qazirgi zamanǵy qaýip-qaterlerge qarsy is-qımyl boıynsha aqparattyq jáne praktıkalyq ózara is-qımyl tıimdiligin arttyrýdyń ózekti máseleleri talqylandy.  

Halyqaralyq terrorızmge, transulttyq uıymdasqan qylmysqa qarsy kúres jáne kıberqaýipsizdik salasynda yntymaqtastyqty kúsheıtý qajettigi aıtyldy.

Arnaýly qyzmetter ókilderi iri halyqaralyq is-sharalar qaýipsizdigin qamtamasyz etýge baǵyttalǵan sharalardy josparlaý jáne uıymdastyrý boıynsha tájirıbe almasty.

Jıyn qorytyndysy boıynsha tıisti sheshimder qabyldanyp, olardy iske asyrý boıynsha naqty sharalar aıqyndaldy.