Almatyda TKSh-ny jańartý bıylǵy jazda-aq bastalady - QR birinshi vıtse-premeri
ALMATY. 6 mamyr. QazAqparat /Elena Ilınskaıa/ - 10 jyl ishinde turǵyn úı-kommýnaldyq sharýashylyǵyn (TKSh) jańartý baǵdarlamasy aıasynda 11,5 myńnan astam kóppáterli turǵyn úı tártipke keltiriletin bolady. Almatyda baǵdarlama bıylǵy jazda bastalady.
Bul týraly búgin Almatyda TKSh jańartýǵa arnalǵan keńes barysynda QR Premer-Mınıstriniń birinshi orynbasary Ómirzaq Shókeev habarlady.
Onyń aıtýynsha, jaqyn ýaqytta barlyq qalalar men oblys ortalyqtaryndaǵy 150-170 úıdi jóndeýdi bastaýǵa bolady, elimizdiń ár qalasynda 10 úı kúrdeli jóndeýge daıyn. Biraq ol jergilikti bılikten belsendi jumys atqarýdy talap etedi.
Ó.Shókeev atap ótkendeı, TKSh jańartý baǵdarlamasy qazirgi zaman talabymen úndes, óte qajet ári qarapaıym. Ol úsh baǵyttan turady: birinshisi - jelilerdi jóndeýden ótkizý. «Biz barlyq qalalar men aımaqtardan jelilerdi jóndeýden ótkizýge qatysty jobalardy jınastyrdyq. Olar, barlyǵyna belgili, 50-den 70 paıyzǵa deıingi deńgeıde tozǵan, sondyqtan olardy aýystyrý qajet. Onyń ústine osy jumystardyń 30 paıyzy bıýdjettik qarjyǵa, 70 paıyzy tarıf esebinen júrgiziledi. Ondaıda tarıftiń ınvestıtsııalyq quramy jyldarǵa sozylyp ketetini de túsinikti. Biraq biz tarıfterdiń ósimi belgilengen kórsetkishterden asyp ketpeýine tyrysyp baǵamyz», - dep atap ótti Ó.Shókeev.
Ekinshi baǵyt, onyń aıtýynsha, termojańartý arqyly kádýilgi jóndeýden ótkizý. «Memleket basshysynyń talaby boıynsha qandaı da bir jóndeý jumystary resýrstardy, ásirese jylýdy únemdeý arqyly júzege asyrylýy tıis. Jylýdy paıdalaný arqyly, eýropalyq eldermen salystyrǵanda biz 1 sharshy metrge 4-5 ese kóp shyǵyndaımyz. Jańartý men ınnovatsııalardy engizý 35-50 paıyzǵa deıin jylýdy únemdeýge múmkindik beredi», - dedi QR birinshi vıtse-premeri.
Onyń aıtýynsha, úshinshi baǵyt - áleýmettik -kásipkerlik korporatsııasy (ÁKK) qatysýy arqyly kúrdeli jóndeý júrgizý. Bundaı jaǵdaıda máselen, 60 páterli úıdi jóndeýge 30-40 mln. teńge jumsaıdy. «Sheshim ákimdiktermen birlese otyra kondomınıýmdarmen qabyldanady jáne biz de qarjy bólýge daıynbyz. Olardy biz ákimdikterge ÁKK-ny kapıtaldandyrý úshin alǵashqy 2-3 jylǵa, al odan keıin ÁKK-ty nesıelendirý úshin bólemiz», - dep atap ótti Ó.Shókeev. Onyń aıtýynsha, Almatyda TKSh jańartý jumystary keń aýqymdy bolyp, Almaty úshin bólingen 2,2 mlrd. teńge qarjy jedel ıgerilgen jaǵdaıda kóbeıtilýi múmkin.
