Almatyda Tımırıazev kóshesinde avtobýs pen djıp soqtyǵysty
ALMATY.QazAqparat - Almatynyń Tımırıazev pen Baızaqov kósheleriniń qıylysynda №70 avtobýs pen jol talǵamaıtyn kólik soqtyǵysty, dep habarlaıdy QazAqparat tilshisi.
«Tımırıazev kóshesiniń boıymen Rozybakıev jaqtan kele jatqan edim. Jol talǵamaıtyn kólik aldymnan shyǵa keldi. Avtobýsta 10-ǵa jýyq jolaýshy bolatyn. Tejegishti basyp, barynsha aqyryn júrdim. Saǵatyna 30-35 shaqyrym jyldamdyqpen kele jatqanymda oń jaǵymdaǵy jol talǵamaıtyn kólik júrgizýshisi kenet burylyp qaldy», - dedi avtobýs júrgizýshisi Aqtilek Sultanbekov.
Jol talǵamaıtyn kólik júrgizýshisi óziniń Tımırıazev kóshesimen batys baǵytta júrgendigin aıtty.
«Munda barlyq jerde eki jolaqtan syzylǵan. Kesip óte almas edim. QazUÝ-ge bara jatyr edim, myna jerde burylys bolǵan soń buryldym. Avtobýs meni soǵyp ketti»,-dedi ol.
Jol kólik oqıǵasynan avtobýs jolaýshysy jaraqat aldy. Soqtyǵys kezinde áıel adam jaralanǵan. Ol medıtsınalyq qyzmetten bas tartty.
Oqıǵanyń mán-jaıyn tártip saqshylary anyqtaýda. Boljam boıynsha jol apatyna jol talǵamaıtyn kólik ıesi kináli.
Eske sala ketsek, Tımırıazev kóshesinde qoǵamdyq kólikter joldyń qaq ortasymen júre bastaǵan. Tıisinshe aıaldamalar da jol ortasyna aýystyryldy.
Sondaı-aq, qalalyq ІІD 27 tamyz ben 10 qyrkúıek aralyǵynda avtokólik ıelerin Tımırıazev kóshesindegi jańa qozǵalys erejesimen tanystyrýdy qolǵa alǵan bolatyn. (Baızaqovadan Baıtursynovqa deıin) Soǵan qaramastan júrgizýshilerdi jazalamaýǵa ýáde bergen.
