Almatyda «Til - ult mádenıetiniń qazynasy» atty mádenı is-shara ótýde

22 qyrkúıek - Qazaqstan halyqtarynyń tilderi kúni merekesine oraı uıymdastyrylǵan bul ıgi sharaǵa qaladaǵy birqatar etno-mádenı ortalyqtardyń basshylary men kórkemónerpazdyq ujymdary qatysyp jatyr.

«Til - árbir ulttyń negizi. Ony biriktiretin, ári qaraı damytatyn rýhanı kúsh-qýaty, mádenıeti. Sondyqtan tildi adam boıyna birinshi kezekte án arqyly, áýen arqyly sińirý qajet dep bilem. Búgingi shara - sonyń aıqyn dáleli. Ol Qazaqstanda ómir súretin basqa da halyqtar arasynda memlekettik til - qazaq tilin barynsha nasıhattaýǵa arnalǵan. Búgin minekı, munda qazaq tilinde án shyrqalyp, kúı oınalyp, bıler oryndalýda. Osy kontserttik baǵdarlamadan keıin «Til-ult mádenıetiniń qazynasy» atty semınar ótedi», - dedi óz sózinde QR Memlekettik ortalyq mýzeıiniń ǵalym-hatshysy Ǵalııa Temirton.

Búgingi is-shara barysynda sonymen qatar, birqatar etno-mádenı ortalyqtardyń kishigirim kontserti uıymdastyryldy.

Sondaı-aq atalǵan is-shara aıasynda mýzeıdiń hollynda baspalar men kitap dúkenderiniń stýdentterge, mektep oqýshylaryna, oqytýshylar men ata-analarǵa arnalǵan kórme-jármeńkesi ashyldy. Oǵan qosa kelýshilerge «EShKO» korrespondenttik oqý-ádistemelik eýropalyq mektebi jáne «GULZAR» lıngvıstıkalyq ortalyǵynyń qyzmetteri tanystyryldy.

Qazir mýzeıde «Til - ult mádenıetiniń qazynasy» atty semınar ótýde. Oǵan til bilimi salasynyń belgili ǵalymdary, memlekettik jáne táýelsiz taldaý qurylymdarynyń jetekshi sarapshylary, qoǵamdyq uıymdar men ulttyq-mádenı ortalyqtardyń, qazaq tilin oqytý ortalyqtarynyń keńesshileri, qala baspalarynyń qyzmetkerleri, til mamandary, respýblıkamyzdyń jetekshi joǵary oqý oryndarynyń stýdentteri men oqytýshylary qatysýda.