Almatyda tejegishi isten shyqqan KrAZ avtobýsty soǵyp, 5 adam jaraqat aldy
ALMATY. QazAqparat - Almatyda aýyr júk kóliginiń tejegishi isten shyǵyp avtobýsty qaǵyp ketti. Jol apatynan 5 adam jaraqat aldy, dep habarlaıdy QazAqparat tilshisi oqıǵa ornynan.
Jol oqıǵasy Qyzyl tý aýylynda bolǵan.
KrAZ aýyr júk kóligi Qulja tas jolyndaǵy jańa aınalma jolmen shyǵysqa baǵyt alyp kele jatqan. Ortalyq kóshege shyǵar tusta júk kóliginiń tejegishi isten shyǵyp joldaǵy №418 baǵdardyń avtobýsyn qaǵyp ketti.
Jol apatynan avtobýstyń 5 jolaýshysy japa shekken. Oqıǵa ornyna jetken jedel járdem olardy aýrýhanaǵa alyp ketti.
