Almatyda termometr men dene qyzýyn túsiretin dárige suranys ósti
ALMATY. QazAqparat - Almaty qalalyq taýarlar men qyzmetterdiń sapasy men qaýipsizdigin baqylaý departamenti dári tapshylyǵy týyndaǵanyn jarııalady, dep habarlaıdy QazAqparat tilshisi.
«Shekteý bitýine baılanysty Almatyda respıratorlyq vırýs ınfektsııasynyń óskeni baıqalady. Atap aıtqanda, koronavırýs ınfektsııasynyń da óskeni ras. Osy jaǵdaıda neǵurlym jıi qoldanylatyn dárilik zattar men medıtsınalyq buıymdarǵa suranys ósti. Ásirese, termometrge. Bul rette kóp azamattar áleýmettik jelilerdegi beıresmı keńesterge jáne óz tanystarynyń keńesterine súıene otyryp, óz betimen emdelý úshin dárilik zattar satyp ala bastady», - dedi departamenttiń baspasóz qyzmetinen.
Mamandar qaladaǵy kóterme saýda kompanııalary men dárihanalarǵa júrgizilgen monıtorıng boıynsha dárilik preparattar jetkilikti dep sendirdi.
«Qaladaǵy dárihana men qoımalarda 24 370 qorap Paratsetamol 0,5 №10 bar, sondaı-aq «Inkar» jáne «Medservıs plıýs» kompanııalaryna 450 000 qorap dári ákelindi. Olar qazir kedendik rásimdeýde tur. Odan bólek, Panadol, Efferalgan, Ferveks, Koldreks, Kún/Tún, jáne basqa da quramynda paratsetamol bar dáriler jetkilikti. Atsıklovır dárilik zatynyń vırýsqa qarsy uqsas túrleri Ingoverın, Tamıflıý, Kagotsel jetkilikti. 68 480 qorap Ingoverın 90 dárisi sertıfıkattan ótip jatyr. Shildede satylymǵa túsedi» dedi departamentten.
Al termometrge qatysty kóterme farmkompanııalarmen Qazaqstanǵa osy medıtsınalyq buıymdy jyldam jetkizýge kelissóz júrgizilip jatyr. Ónimdi óndiretin elderde úlken suranys bolǵandyqtan (Reseı, Qytaı Halyq Respýblıkasy) jáne basqa da elderge shyǵarlatyndyqtan shektelgen kólemde jetkizilip jatyr.
«Osy múmkindikti paıdalana otyryp, biz halyqty óz betinshe emdelmeýge shaqyramyz. Ásirese antıbıotık qabyldamaý kerek. Óıtkeni bunyń saldary qaıǵyly jaǵdaıǵa ákep soǵýy múmkin. Áleýmettik jelilerde paıda bolǵan feık jańalyqtarǵa senbeýge shaqyramyz. Aýrýdyń aldyn alý maqsatynda qazirgi ýaqytta dárýmenge baı tamaqtardy kóp ishý qajet. Dárihana uıymdaryna farmatsevtıkalyq qaýymdastyq jáne tikeleı retseptsiz ótkiziletin dárilik zattardyń sanyn shekteýdi usynamyz», - dedi departamentten.
