Almatyda terakti jasaýǵa úgittegen qylmystyq top ustaldy
ALMATY. QazAqparat - Almaty qalalyq Іshki ister departamenti lańkestikti nasıhattap, adamdardy terrorlyq akti jasaýǵa úgittegen qylmystyq topty ustady, dep habarlaıdy QazAqparat tilshisi ІІD-niń baspasóz qyzmetine silteme jasap.
«27 qarasha kúni Almaty qalalyq ІІD sotqa deıingi tergep-tekserýdiń biryńǵaı reestrinde tirkelgen qylmystyq is aıasynda bir top adamdy qolǵa túsirdi. Olarǵa qatysty QR QK 256-babynyń 1-bóligi (lańkestikti nasıhattaý, terrorlyq akti jasaýǵa úgitteý) boıynsha qylmystyq is qozǵalǵan», - delingen habarlamada.
Naqtyraq aıtqanda, A.Jumaǵulovany, O. Omyrova men K.Ábishevany tutqynǵa alý bultarpaý sharasy qabyldandy. Tergeý nusqasynda atalǵan adamdardyń tirkelmegen qoǵamdyq uıym atynan Almaty qalasynda qoǵamdyq tártipti buzýǵa áreket etpek bolǵany kórsetilgen. Atap aıtqanda, atalǵan top halyqtyń úreıin alyp, quqyq qorǵaý organdary qyzmetine zııan keltirmek bolǵan. Qylmystyq pıǵyldaryn júzege asyrý úshin olar úgit-nasıhat materıaldaryn ázirlegen. Sonymen qatar, qarýly jıhadqa shaqyratyn beıne úndeý jazǵan.
Anonımdi beıneúndeýde olar betterin búrkemeleı otyryp, Qazaqstanda tyıym salynǵan «Hızb-ýt-Tahrır» dinı-ekstremıstik uıymynyń sımvoldary men qarý-jaraqty paıdalanyp, halyqty jappaı zańǵa qaıshy áreket jasaýǵa, ıdeıalaryna qoldaý tanytýǵa shaqyrǵan. Qalalyq ІІD-niń baspasóz qyzmeti beıneúndeýdegi qarý-jaraqtardyń kimge tıesili ekeni anyqtalyp jatqanyn aıtty.
«Atalǵan rolık, elektrondy tasymaldaǵyshtar jáne dinı ádebıetter ustalǵandardyń turǵylyqty jerin tergeý kezinde tárkilenip, tergeý materıaldaryna qosyldy. Materıaldar boıynsha qajetti saraptama taǵaıyndaldy», - dedi ІІD-den.
Sonymen qatar, kúdiktiler óz qataryn tolyqtyrý maqsatynda jaqtastaryn izdep, olardy «qaqpanǵa» túsirý áreketterin qol alǵan. Sondaı-aq olar zań qarmaǵyna ilinip qalmas úshin birqatar jasyryn jospar jasaǵan. Naqtyraq aıtqanda, quqyq qorǵaý organdary qyzmetkerleri men memlekettik qyzmetshilerdi qorqytyp, úrkitý úshin anonımdi telefon soǵýdy, olardy jáne otbasylaryn jazalaıtyny týraly aıtylǵan beınerolıkterdi joldaýdy josparlaǵan. Tergeý amaldary barysynda atalǵan topqa Qazaqstanda sot ádildiginen qashyp júrgender tapsyrma bergen bolýy múmkin degen nusqa da qarastyrylýda.
«Qazirgi ýaqytta Jumaǵulova, Omyrova, Ábisheva Almaty qalalyq ІІD tergeý abaqtysynda qamaýda. Qylmystyq toptyń ózge de qatysýshylaryna qatysty bultartpaý sharasyn qoldaný máselesi sheshilýde. Іstiń mán-jaıyn anyqtaý úshin tergeý amaldary júrgizilip jatyr», - delingen taratylǵan habarlamada.
ІІD-niń baspasóz qyzmeti tergeý amaldaryna baılanysty iske qatysty tolyq aqparattar ázirge jarııalanbaıtynyn jetkizdi.
