Almatyda tennısten jasóspirimderdiń dástúrli birinshiligi ótip jatyr
ALMATY. Tamyzdyń 10-y. QazAqparat /Erbol Turymbetov/ - Keshe Almatydaǵy «Dostyq» sport kesheninde 18 jasqa deıingi jasóspirimder arasynda úlken tennısten jyl saıyn ótetin Qazaqstan birinshiligi bastaldy,
dep habarlaıdy QazAqparat.
Ony Qazaqstan tennıs qaýymdastyǵynyń Almaty qalalyq bólimshesi uıymdastyryp otyr. Oǵan Respýblıkamyzdyń ár aımaǵynan kelgen 32 ul jáne 32 qyz bala qatysýda. Keshe jalaýyn kótergen bul baıraqty básekeniń maqsaty elimizde keıingi jyldary qarqyn alyp kele jatqan tennıs sportyn damytý, jasóspirimderdi osy sport túrine baýlý.
Saıystyń bas tóreshisi Anton Ignatchenkonyń aıýynsha, jarysqa qatysýshylardyń ishinde Ońtústik Qazaqstan oblysynan kelgen jas sportshy Serjan Esenbekov pen almatylyq Anton Saranchýkov bolashaǵynan zor úmit kúttiredi. Sonymen qatar, olar osy birinshiliktegi basty oıynshylar bolyp sanalýda.
Aıtýly báseke juma kúni qorytyndylanady. Osy kúni jekeleı jáne juptasyp óner kórsetýshilerdiń jeńimpazdary anyqtalady.
