Almatyda tennısten Qazaqstan jasóspirimder chempıonaty márege jetti
NUR-SULTAN. QazAqparat – Almatydaǵy «Eıs» tennıs ortalyǵynda 18 jasqa deıingi jasóspirimder arasynda Qazaqstan chempıonaty márege jetti, dep habarlaıdy QazAqparat tilshisi.
Qazaqstan tennıs federatsııasy málim etkenindeı, oǵan elimiz óńirlerinen eń myqty degen jas sportshylar qatysty.
Bozbalalar arasynda qaraǵandylyq Arslanbek Aıtqulovtyń mereıi ústem boldy. Ol fınalda týrnırdiń 3-raketkasy, elordalyq Islam Orynbasardy 5:7, 6:0, 6:4 esebimen utty.
Pavlodarlyq Ilıa Vedmedten 6:1, 6:3 esebimen aılasyn asyrǵan almatylyq Janger Almashev úshinshi orynǵa ıe boldy.
Qyzdar arasynda almatylyq Aııa Nupbaı jeńimpaz atandy. Ol ótken jylǵy chempıon, elordalyq Janel Rústemovany qapy qaldyrdy (7:5, 6:2).
Úshinshi oryn úshin báseke almatylyq apaly-sińlili Asyljan men Erkejan Arystanbekovalardyń arasynda ótýi kerek edi. Biraq Erkejan apasyna jol berýdi uıǵaryp, kortqa shyqqan joq.
Esesine Erkejan Asyljanmen birge juptyq synda Janel Ospanova men Ádemi Amangeldini jeńip, chempıon atandy. Qola júlde elordalyq Ýlıana Romanova men A.Nupbaıǵa buıyrdy.
Bozbalalar arasynda juptyq synda I.Orynbasar men aqtaýlyq Danıal Rahmatýllaev sońǵy básekede aqtóbelik Aleksandr Chernomaz ben qaraǵandylyq A.Aıtqulovtyń meselin qaıyryp, jeńis tuǵyryna kóterildi. Qola júlde qyzylordalyq Erasyl Erdilda men almatylyq Danııl Felkerdiń qanjyǵasynda ketti.
Jarystyń bas tóreshisi Anton Ignatchenko jyl saıyn jasóspirim oıynshylardyń sheberligi ósip kele jatqandyǵyn atap ótti.
Eske sala keteıik, budan buryn Qazaqstannyń úzdik jas tennısshileri anyqtalǵanyn, Denıs Evseevtiń juptyq synda Portýgalııadaǵy týrnırdiń fınalyna shyqqanyn jazǵan bolatynbyz.
