Almatyda temir jol bıletterin qoldan satatyn alypsatarlar ustaldy
ALMATY. Qyrkúıektiń 28-i. QazAqparat /Ádilet Musahaev/ - Keshe «Jolaýshylar tasymaly» AQ qyzmetkerleriniń alypsatarlarmen josparly túrde júrgizilgen keshendi kúres aıasynda Almaty-1 temir jol stansysynyń vokzal mańy alańynda 3 adam ustaldy.
Jol júrý qujatyn alyp-satty degen kúdikpen qolǵa túsken azamattar jelilik ishki ister bólimine jetkizilgen. Ustalǵandardyń ekeýi buǵan deıin de zańsyz árekettermen aınalysyp, birneshe ret polıtseıler qolyna túsken. Qoǵamdyq tártipti buzyp, kishi buzaqylyqtarmen aınalysqan alypsatarlarǵa qatysty is qozǵaldy.
Aǵymdaǵy jyldyń shilde aıynan bastap elde 27 alypsatar qolǵa túsip, polıtsııaǵa jetkizilgen.
«Jolaýshylar tasymaly» AQ azamattardan kelip túsken kóptegen shaǵymdarǵa baılanysty qoldan bılet satý áreketterin joıý maqsatynda vokzal mańyndaǵy jeke kassalarda baqylaýdy kúsheıtip, reıdter júrgizip otyr jáne kezektegi adamdardyń sanyn azaıtý úshin elektrondy jolmen bılet satýda.
Qazir Astana, Almaty, Qaraǵandy jáne Aqtóbe stansylaryndaǵy vokzaldarda bılet satatyn 18 avtomat ornatylýda. Ol azamattarǵa jol júrý qujattaryn ózdiginshe satyp alýǵa jáne ınternet arqyly tapsyrys bergen bıletterdi rásimdeýge múmkindik beredi. Kelesi jyly Qazaqstannyń iri aımaqtarynda taǵy 15 avtomatty ornatý josparlanyp otyr. Jolaýshylarǵa jaıly jaǵdaı jasaý maqsatynda 2010 jyldyń shildeniń 20-synan bastap Astana men Almaty qalalarynda Internet arqyly rásimdelgen bıletterdijetkizýdiń jańa qyzmeti iske qosylǵan. Sondaı-aq kompanııa jyl sońyna deıin elimizdiń barlyq óńirinen tabylatyn tólem termınaldary arqyly bılet satýdy qolǵa almaq.
Temir jolda kezdesetin zańsyz áreketterge baılanysty azamattar shaǵymdaryn «Jolaýshylar tasymaly» AQ prezıdentiniń blogyna jibere alady.
