Almatyda «Temeki tartýdan azat aımaq» sany ulǵaıyp kele jatyr
trong>Qazannyń 30-y. QazAqparat /Erlik Erjanuly/ - Almatyda Shymbulaq pen Medeý demalys oryndaryn «Temekiden azat aımaq» dep jarııalaý josparlanýda.
Bul týraly búgin Almatyda 4-shi saılanǵan qalalyq máslıhattyń HHІІ sessııasynda aıtyldy, dep habarlaıdy QazAqparat.
2007 jyldyń 3-shi shildesindegi ІІІ saılanǵan qalalyq máslıhattyń HHHІ sessııasynyń sheshimimen qazir «2008-2011 jyldarǵa arnalǵan Almaty temeki tútininen azat qala. Azıada 2011» baǵdarlamasy júzege asyrylýda. Densaýlyq saqtaý basqarmasynyń bastyǵy Erkin Dúrimbetovtiń aıtýynsha, byltyr baǵdarlamany qarjylandyrýǵa bólingen 51 mıllıon 382 myń teńge 99,9 paıyzǵa ıgerilgen edi. Bıyl 37 mıllıon 177 myń teń bólinip, 9 aıda onyń 51 mıllıon 365 myńy jaratyldy. Qazirgi ýaqytta barlyq medıtsına mekemelerinde temeki shegýge tyıym salynǵan. 2007-2008 jyldary 2 joǵary oqý orny men 3 orta arnaýly oqý ornynda «temekiden tartýdan azat aımaq» jarııalanǵan. Bıyl olardyń qataryna 6 JOO men qalalyq medıtsına kolledji qosyldy. Medeý aýdanyndaǵy 3 mektepte «tútinsiz mektep» mártebesine ótýge daıyndyq jumystary júrgizilýde. «Temekige qarsy ortalyqtar» 28 medıtsına mekemesinde, 11 oqý ǵımaratynda jáne 4 «Demalys» ortalyǵynda jumys isteýde.
«Qalalyq medıtsınalyq-áleýmettik túzetý ortalyǵy bazasynda TMD elderindegi eń alǵashqy nıkotınge táýeldilikten emdeıtin statsıonar jumys jasaýda. Onda osy ýaqytqa deıin 143 adam emdelse, onyń 71-i - bıylǵy jyldyń úlesinde. Almaty temeki tartýmen kúreske baǵyttalǵan naqty is-sharalar qoldanylǵan Qazaqstandaǵy ázirge jalǵyz qala. Endi Shymbulaq jáne Medeý demalys oryndaryn «Temekiden azat aımaq» dep jarııalaý josparlanýda», deıdi Erkin Ermekuly.
