Almatyda telemedıtsına jáne jedel járdem qyzmeti ońtaılandyryldy
ALMATY. QazAqparat - Almaty qalasy ákiminiń orynbasary Erjan Babaqumarov COVID-19 juqtyrǵan adamdarǵa medıtsınalyq kómek kórsetý jáne olardyń jaǵdaıyn baqylaý algorıtmin iske asyrýdy qamtamasyz etetin birqatar nysanda boldy, dep habarlaıdy QazAqparat tilshisi.
Erjan Babaqumarov jumys sapary barysynda jedel medıtsınalyq járdem stantsııasy qyzmetine, telemedıtsına ortalyǵyna, sondaı-aq qalalyq densaýlyq saqtaý júıesiniń shtabyna bardy. Medıtsınalyq mekemelerdiń qyzmetkerlerimen kezdesip, qalada epıdemıologııalyq ahýal odan ári ýshyqqan jaǵdaıda jumysty kúsheıtý týraly máselelerdi talqylady.
Telemedıtsına ortalyǵynda ákimniń orynbasary COVID-19 yqtımal jáne rastalǵan jaǵdaılary bar patsıentterge keńes berý jáne monıtorıng júrgizý jumysymen tanysty. Operatorlar patsıenttiń jaǵdaıyn baǵalaıdy, emdeýdi taǵaıyndaıdy jáne naýqastyń elektrondyq kartasyna ózgerister engizedi. Ortalyq ótken jyldyń qyrkúıek aıynan bastap jumys isteıdi.
«Búgingi tańda ortalyq úı karantınindegi aýrýdyń belgileri joq jáne aýrýy jeńil naýqastarǵa 2500-ge jýyq naýqasqa qyzmet kórsetedi. Osy maqsatta munda 54 dáriger jumys isteıdi. Ortalyq dárigerleri patsıenttermen táýlik boıy baılanysta. Mamandar tańerteń jumystary úı statsıonaryndaǵy patsıentterge qońyraý shalýdan bastalady. Jaǵdaıy nasharlaǵan jaǵdaıda naýqastarǵa jedel járdem shaqyrylyp, aýrýhanaǵa jatqyzylady», - dedi Telemedıtsına ortalyǵynyń basshysy Laýra Myrzaǵalı.
Sonymen qatar, qalada 200-den astam mobıldi top jumys isteıdi, olar patsıentterdiń jaǵdaıyn jáne úıde emdelýin qadaǵalaıdy.
Sondaı-aq Erjan Babaqumarov №6 jedel járdem qosalqy stantsııasyna bardy.
Koronavırýs pandemııasy kezeńindegi jumys tájirıbesin eskere otyryp, qalada jedel medıtsınalyq kómek qyzmetiniń materıaldyq-tehnıkalyq bazasy turaqty jaqsarýda. Buǵan deıin qala ákimdigi jedel medıtsınalyq járdem qyzmetiniń avtoparkine 50 jańa Hyundai – N 350 BUS Ambulance avtokóligin bergen bolatyn. Jańa mashınalar sol jerde medıtsınalyq kómek kórsetýge jáne ýaqtyly emdeýge jatqyzýǵa qajetti zamanaýı, portatıvti jabdyqtarmen, onyń ishinde reanımatsııalyq, defıbrıllıatorlarmen, elektrokardıograftarmen, ÓJJ apparattarymen jáne basqa da qajetti jabdyqtarmen jabdyqtalǵan. Jalpy, ótken jyly jedel járdem qyzmetiniń avtoparki shamamen 70% jańartyldy.
«Pandemııamen kúreste jedel járdem úlken ról atqarady. Sizder naýqastarǵa barasyz jáne barlyq qaýipsizdik sharalaryn saqtaı otyryp, birinshi kezekte ózińizdi qorǵaýlaryńyz kerek. Qala barlyq qajetti zattarmen materıaldyq qamtamasyz etildi», - dep atap ótti Erjan Babaqumarov.
Budan bóle, ol Qoǵamdyq densaýlyq basqarmasynyń shtab-páterinde bolyp, ol jerde bekitilgen medıtsına qyzmetkerlerimen áńgimelesti.
Jumys saparynyń qorytyndysy boıynsha qalanyń qoǵamdyq damý basqarmasyna birqatar naqty tapsyrmalar berildi.
