Almatyda tehnıkalyq jóndeý ortalyǵynyń jumysshysy jóndeýge ákelingen kólikti urlap ketti - Almaty polıtsııasy
ALMATY. 14 qyrkúıek. QazAqparat /Názıra Eleýhan/ - Almatyda tehnıkalyq jóndeý ortalyǵynyń jumysshysy jóndeýge ákelingen kólikti urlap ketti, dep habarlaıdy ІІD baspasóz qyzmeti.
Rysqulov dańǵyly boıynda ornalasqan tehnıkalyq jóndeý ortalyǵynyń jumyskeri 21 jasataǵy Erjandy sońǵy úlgidegi «Mersedes» avtokóligi qatty qyzyqtyrsa kerek. Kóliktiń qozǵalys bóligindegi aqaýlardy qalpyna keltirýdiń ornyna ol kólikti qýyp ketken.
«Qymbat turatyn» «Mersedes» avtokóligin qojaıyny tańǵy saǵat toǵyzdar shamasynda kólik aqaýyn jóndetýge TJO-na qaldyryp ketken. Nebári birer mınýttan keıin-aq osy ortalyqtyń kólik jóndeý sheberi densaýlyǵynyń nasharlap turǵanyn aıtyp, temir tulpardy minip ketip qalǵan. Ózgeniń kóligin qýyp áketken qaskóıdi áriptesteri de baıqamaı qalǵan. Tek qana kelisilgen ýaqytta kóligin alyp ketýge kelgen qojaıyny temir tulparynyń qoldy bolǵandyǵyn baıqaıdy. Jábirlenýshiniń tez arada ýaqyt ozdyrmastan polıtsııaǵa habar bergendiginiń arqasynda biz qylmyskerdiń izine tústik»,-dep málim etti Almaty qalasy ІІD Jol polıtsııasy basqarmasy bastyǵynyń orynbasary polıtsııa polkovnıgi Muhtar Túsúpov.
Birer mınýtta-aq engizilgen «Quryqtaý» jospary nátıjesinde kúdikti Seıfýlın dańǵyly boıynda qolǵa túsken. Onyń aıtýyna qaraǵanda, ol tek qana jeńil júristi qyzdardy kólikke mingizip alyp, qala kóshelerin sharlap qaıtpaqshy bolǵan.
«Júrgizilgen tergeý amaldarynan keıin temir tulpar óz qojaıynyna qaıtarylyp, qylmysker qamaýǵa alyndy. Keıinirek belgili bolǵandaı, ol alyp shahar Almatyǵa jaqyn kúnderi ǵana Ońtústik Qazaqstan oblysynyń Maqtaral aýdanynan aqsha tabý úshin kelgen. Kólik jóndeý isinde az ǵana tájirıbesi bar ol osy salada biraz eńbek etýdi jón sanaǵan. Al óz kezeginde TJO-nyń qojaıyny bul jumyskerdiń buryn sotalǵandyǵy jaıynda múldem beıhabar bolyp shyqty. Qazirgi tańda ózgeniń múlkin urlaǵandyǵy úshin oǵan qatysty qylmystyq is qozǵaldy. Tergeý amaldary jalǵasýda»,-dedi M.Túsúpov.
