Almatyda tegin stomatologııalyq qyzmet kimderge kórsetiledi

ALMATY. QazAqparat – Almatyda ambýlatorııa deńgeıindegi josparly jáne shuǵyl stomatologııalyq kómek mindetti áleýmettik medıtsınalyq saqtandyrý paketimen qarjylandyrylady jáne azamattardyń jekelegen sanattaryna tegin kórsetiledi. Bul týraly Almaty qalalyq qoǵamdyq densaýlyq saqtaý basqarmasynyń emdeý-profılaktıkalyq qyzmet bóliminiń jetekshisi Láıla Imanǵalıeva aıtty, dep habarlaıdy QazAqparat tilshisi.

Spıkerdiń aıtýynsha, josparly stomatologııalyq kómek 18 jasqa deıingi balalar men júkti áıelderge kórsetiledi.

«Olar tisti jansyzdandyrý, hımııalyq plomba salý, terapevtiń qabyldaýy, pýlpıt pen perıdontıtti emdeý, flıýoroz, gıpoplazııa kezinde tistiń anatomııalyq pishinin tolyq qalpyna keltirý, tisti hırýrgııalyq jolmen julý, basqa da qyzmetterdi tegin paıdalana alady. Tis dárigeriniń qyzmetine júginý úshin stomatologııalyq klınıkaǵa habarlasyp, qabyldaýǵa jazylǵan durys», - dedi dáriger.

Shuǵyl stomatologııalyq kómek kepildendirilgen tegin medıtsınalyq kómek paketi sheńberinde, halyqtyń áleýmettik jaǵynan az qorǵalǵan sanattaryna ǵana kórsetiledi.

«Olardyń qatarynda 18 jasqa deıingi balalar, júkti áıelder, UOS ardagerleri, barlyq toptaǵy múgedekter, «Altyn alqa», «Kúmis alqamen» marapattalǵan kóp balaly analar, zeınetkerler, ataýly áleýmettik kómek alýshylar, juqpaly jáne áleýmettik mańyzy bar syrqattarmen aýyratyn naýqastar, balalyq shaqtan І top múgedegin kútýshiler bar»,- dedi Láıla Imanǵalıeva.

Onyń málimetinshe, stomatologııalyq kómekti medıtsınalyq saqtandyrý júıesinde jumys isteıtin jeke menshik tis klınıkalary arqyly da alýǵa bolady. Olardyń tizimi mynaý siltemede ornalasqan.

Spıker stomatologııalyq kómekke qatysty barlyq suraqtardy medıtsına uıymy janyndaǵy Patsıentterdi qoldaý qyzmetine joldaýǵa bolatynyn eske saldy.