Almatyda tegin dáriler isine qatysty kýáger qyzmetker sotta kúdiktige aınaldy
ALMATY. QazAqparat - Almatyda qalalyq Qoǵamdyq densaýlyq basqarmasynyń burynǵy basshysy Serikbol Mýsınovtyń isi jalǵasyp jatyr. Sot otyrysynda basqarma qyzmetkeri, buǵan deıin kýáger bolyp kelgen Baǵlan Serikpaev endi kúdiktige aınaldy, dep habarlaıdy QazAqparat tilshisi.
Búgingi otyrysta medıtsınalyq mekemelerde tekserý jasaǵan Bostandyq aýdandyq prokýrory Aıdos Tólepbergenovten suraq-jaýap alyndy.
Onyń aıtýynsha, prokýratýra organdary qaladaǵy 37 emhanany tekserý týraly tapsyrma bergen.
«QR Bas prokýratýrasyna tegin dárini ala almaı otyrǵan azamattardan kóp shaǵym túse bastaǵan. Biz tekserýdi bastadyq. Qalalyq Qoǵamdyq densaýlyq basqarmasy qajetti qujattardy kórsetýden bas tartty. Jaýapty tulǵalar memlekettik satyp alý boıynsha qujattardyń barlyǵy arhıvte jatqanyn aıtty. Olar 1 aı boıy para usyndy, men bas tarttym. Tekserý barysynda tegin dári taratýda zańbuzýshylyqtar bary anyqtaldy. Azamattar bul dárilerge qol jetkize almaǵan. Parany basqarma qyzmetkeri Baǵlan Serikpaev pen bólim basshysy Janar Boranbaeva usynǵan. Maǵan tender qorytyndysy týraly hattamany berýden bas tartty», - dedi Aıdos Tólepbergenov.
Prokýrordyń aıtýynsha, Serikpaev aqsha kólemin qaǵazǵa jazyp kórsetken. Alaıda, Boranbaeva men Serikpaevtyń ekeýi de Mýsınovtiń para týraly bilgenin aıtty. Mýsınovtiń aıtýynsha, ol prokýratýranyń tekserýden soń para talap etkenin qolastyndaǵy qyzmetkerlerden estigen.
Munyń aldyndaǵy sot otyrysynda Serikbol Mýsınov ózine taǵylǵan aıypty moıyndamaǵan bolatyn.
Belgili bolǵandaı, 17 sáýirden bastap buǵan deıin kýáger bolyp kelgen Baǵlan Serikpaev kúdiktige aınaldy.
Eske salaıyq, Densaýlyq saqtaý basqarmasynyń burynǵy basshysy Serikbol Mýsınovqa qatysty para berdi degen kúdikpen is qozǵalǵan bolatyn.
Basqarma basshysy qyzmetinen 2018 jyly 20 qyrkúıekte bosatyldy. Ol qalalyq basqarmany 2017 jyldyń qarashasynan beri basqaryp kelgen edi. Qyzmet jolyn Shyǵys Qazaqstan oblysy Aıagóz aýdandyq aýrýhanasynda ıntern-dáriger bolyp bastaǵan. Ár jyldary Semeı oblysy Densaýlyq saqtaý basqarmasynyń basshysy, Astana qalasy Farmatsevtıkalyq baqylaý basqarmasynyń basshysy, Mańǵystaý oblysy Densaýlyq saqtaý basqarmasynyń basshysy qyzmetterin atqarǵan.
