Almatyda «teatrdyń anasy» Sabıra Maıqanovanyń qurmetine arnalǵan memorıaldyq eskertkish taqta ashyldy
ALMATY. Naýryzdyń 29-y. QazAqparat /Názıra Eleýhan/ - Almatyda KSRO jáne QazKSR halyq ártisi, memlekettik syılyqtyń laýreaty «teatrdyń anasy» atanǵan Sabıra Maıqanovanyń qurmetine memorıaldyq eskertkish taqta ashyldy,
dep habarlaıdy QazAqparat.
Eskertkish taqta qazaqtyń uly aktrısasy sońǵy jyldary turǵan úıinde qoıyldy.
Qala ákiminiń orynbasary Serik Seıdýmanovtyń aıtýynsha, eskertkish taqtany ashýdaǵy maqsat - kórnekti aktrısanyń esimin tanytý, daryn ıesine degen qurmetti kórsetý. «Sabıra Maıqanova elimizdiń teatr ónerine úlken úles qosqan tulǵa. Ol teatrmen qosa, kınoda da kóptegen rólderdi oınady. Onyń ásirese, «áıel-ana» rólderin óte jaqsy somdaǵanyn bári biledi. HH ǵasyrdyń uly aktrısasy sanalatyn daryndy tulǵanyń esimi máńgi tarıhta qalatyny sózsiz», dedi Serik Seıdýmanov.
Sabıra Maıqanova 1914 jyly qańtar aıynyń 1-inde Qyzylorda oblysy, Syrdarııa aýdanynda dúnıege keldi. Halyq ártisi Otan aldyndaǵy eńbegi úshin Eńbek Qyzyl Tý ordenimen jáne birneshe medaldarmen marapattalǵan. 1932 jyldan bastap Muhtar Áýezov atyndaǵy akademııalyq drama teatrynda óner kórsetti. 1967 jyly Qazaq KSR Memlekettik syılyǵynyń laýreaty atandy. 1970 jyly KSRO halyq artısi ataǵyn aldy. Sahna tóriniń sheberi - Sabıra Maıqanova 1995 jyly aqpan aıynyń 14-inde dúnıeden ótti.
