Almatyda teatr óneri qaıratkerleriniń HІ respýblıkalyq praktıkýmy ótip jatyr
ALMATY. 11 sáýir. QazAqparat /Názıra Eleýhan/ - Almatydaǵy Ǵ. Músirepov atyndaǵy Qazaq memlekettik akademııalyq balalar men jasóspirimder teatrynda sheteldik mamandardyń qatysýmen «Teatrlyq rejıssýranyń jańa tásilderi» atty teatr óneri qaıratkerleriniń HІ respýblıkalyq praktıkýmy ótip jatyr.
Іs-sharany uıymdastyrýshylar - QR Mádenıet mınıstrliginiń Mádenıet komıteti men «Qazaqstan halqynyń rýhanı damý qory» AQ.
Praktıkýmǵa Qazaqstannyń aımaqtyq teatrlarynyń 80-nen asa bas rejısserleri men kórkemdik jetekshileri qatysýda. Shaqyrylǵan qurmetti qonaqtardyń quramynda SounDrama stýdııasynyń kórkemdik jetekshisi, rejısser, mýzykant Vladımır Pankov; mýzykant, kompozıtor, ártis, pedagog Vladımır Nelınov bar.
Іs-shara «dóńgelek ústel» túrinde ótýde, onda qazirgi zaman teatrlarynyń ózekti máseleleri, akterler, rejısserler, óner qaıratkerleriniń áleýmettik sharttary, sondaı-aq otandyq teatrlar jumysynyń nátıjeliligi men jetistikteri talqylanýda.
Atalmysh shara 13-shi sáýirge deıin jalǵasady.
