Almatyda «Teatr kóktemi-2017» festıvali máresine jetti
ALMATY. QazAqparat - Almatyda Qazaqstan jáne KSRO halyq ártisi, KSRO memlekettik syılyǵynyń laýreaty, professor Hadısha Bókeevanyń 100 jyldyǵyna arnalǵan «TEATR KÓKTEMІ-2017» festıvali máresine jetti, dep habarlaıdy QazAqparat tilshisi.
Professor Hadısha Bókeevanyń 100 jyldyǵyna arnalǵan «TEATR KÓKTEMІ-2017» festıvaline 5 qoıylym qatysty. Atap aıtqanda, Ǵ. Músirepovtyń «Aqan seri Aqtoqty» tragedııasy, M. Omarovanyń «Aqtastaǵy Ahıko» dramasy, R. Kýnıdiń «Manı Manı» komedııasy, Q. Murattyń «Baqyt kilti» dramasy, M. Omarovanyń «Kómbe nannyń dámi» dramasy kórermen men qazylar nazaryna usynyldy. Festıval H. Bókeevany eske alý keshimen qorytyndylanady. Keshke QR Mádenıet jáne sport mınıstri Arystanbek Muhamedıuly qatysty.
«Qurmetti ónersúıer qaýym, birinshiden, Naýryz merekesimen quttyqtaımyn. Halyqaralyq teatr kúni qarsańynda ónerdiń maıtalmany Hadısha Bókeevanyń 100 jyldyǵy ótip jatyr. Hadısha Bókeeva qazaq óneriniń tarıhynda erekshe oryn alady. Tetar ujymyna osy sharany uıymdastyrǵany úshin kóp-kóp rahmet aıtqym keledi», - dedi Arystanbek Muhamedıuly.
Quttyqtaý sózinen keıin mınıstr festıvalǵa taǵaıyndalǵan H.Bókeeva atyndaǵy QR Mádenıet jáne sport mınıstriniń arnaıy syılyǵyn M. Omarovanyń «Aqtastaǵy Ahıko» qoıylymyna tabys etti.
Osydan keıin, Qazaqstan teatrlar qaýymdastyǵy taǵaıyndaǵan arnaıy júlde akter Erkebulan Daıyrovqa berildi. Syılyqty Asanáli Áshimov tabys etti.
«Úlken syılyq jas ósip kele jatqan akterǵa úlken dáreje. Erkebulan degen balamyz Ánýar Moldabekov, Esbolǵan Jaısańbaev, aramyzdaǵy Sábıt Orazbaevtyń izin basyp kele jatqan daryndy, talantty akter. Sondyqtan, syılyqty óz qolymmen usynamyn», dedi Asanáli Áshimov Erkebulan Daıyrovtyń ornyna kelgen onyń jubaıy aktrısa Lıaılıa Tileýovaǵa usyna otyryp.
Atalǵan festıval 13-18 naýryz aralyǵynda ótti. Hadısha Bókeevanyń 100 jyldyǵyna arnalǵan «TEATR KÓKTEMІ-2017» atty festıvaliniń arnaıy júldeleri birqatar akterlerge tabys etilgenin de aıta keteıik. Sonymen, «Balǵyn talant» júldesi «Kómbe nannyń dámi» qoıylymyndaǵy Sálim shalǵa ilesip júretin bala róli úshin Aıan Bekjanǵa, «Tusaýkeser» júldesi «Aqtastaǵy Ahıko» qoıylymyndaǵy Ahmet aqyn jáne róli úshin Abzalbek Maksımge, «Tusaýkeser» júldesi «Aqtastaǵy Ahıko» qoıylymyndaǵy Ahıkonyń ákesi róli úshin Aıan Ótepbergenge, «Úmit» júldesi «Kómbe nannyń dámi» qoıylymyndaǵy Lıýba ýkraın qyzy roli úshin Lıaılıa Tileýovaǵa, «Shyǵarmashylyq izdenisteri úshin» «Kómbe nannyń dámi» qoıylymynyń rejısseri Alma Kákishevaǵa, «Úzdik Rejıssýra» júldesi «Baqyt kilti» qoıylymynyń rejısseri Esmuhan Obaevqa, «Úzdik stsenografııa» júldesi «Kómbe nannyń dámi» qoıylymynyń sýretshisi Esengeldi Tuıaqovqa dıplom jáne aqshalaı sertıfıkat berildi.
Erekshe atap óteıik, festıval aıasynda qazylar alqasy «Úzdik Er adam beınesi» júldesin «Aqtastaǵy Ahıko» qoıylymyndaǵy Ahıko róli úshin Dýlyǵa Aqmoldaǵa (dıplom jáne aqshalaı sertıfıkat) tabys etti. 
