Almatyda «Teatr kóktemi-2013» festıvaliniń qorytyndysy shyǵaryldy

Onda Orazhan Kenebaev, Bekjan Turys jáne Baýyrjan Qaptaǵaı «Eń úzdik er adam beınesi», Azamat Satybaldy men Almas Shaıahmetov «Úzdik er adam beınesi», Qymbat Tileýova «Eń úzdik áıel beınesi», Dýlyǵa Aqmolda men Rýslan Senkebaev «Ekinshi kezektegi er adam beınesi» júldesin ıelendi. Al Quman Tastanbekov «Este qalar keıipker», Tóleýbek Aralbaı men Ǵaınıkamal Baıqoshqarova «Sátti epızod», Murat Saparov «Kórkem stsenografııalyq sheshimder» júldesin aldy.

Dástúrli túrde jyl saıyn ótetin bul festıvalde Muhtar Áýezov atyndaǵy memlekettik akademııalyq qazaq drama teatrynyń sońǵy 1 jyl ishinde jańadan sahnalanǵan «Shyraq janǵan tún», «Uly men ury», «Jynoınaq», «Men ishpegen ý bar ma?...», «Shákárim» qoıylymdary kórsetildi. Táýelsiz sarapshylardan quralǵan qazylar alqasy ondaǵy akterler men aktrısalardyń eńbekterin saralap, shyǵarmashylyq jumystaryna óz baǵasyn berdi. Sondaı-aq festıval men teatrdyń jumysyn nasıhattaǵany úshin «Zań» gazetinen Sholpangúl Qaraeva, «Qazaq ádebıeti» gazetinen Nazym Dútbaeva, «Lıter» gazetinen Mıra Qudabaeva, «Almaty aqshamy» gazetinen Ótesh Qyrǵyzbaev, «Qazaqstan» ulttyq arnasynan Jazıra Elshibaeva, «KTK» telearnasynan Gúlmıra Ábiqaeva «Teatr jáne aqparat» júldesin ıelendi.