Almatyda «Teatr kóktemi-2011» festıvali ótip jatyr
ALMATY. 25 naýryz. QazAqparat /Ádilet Musahaev/ - Almatyda Qazaqtyń memlekettik M.Áýezov atyndaǵy akademııalyq drama teatrynda KSRO halyq artısi, Memlekettik syılyqtyń laýreaty Ydyrys Noǵaıbaevtyń týǵanyna 80 jyl tolýyna arnalǵan «Teatr kóktemi-2011» festıvali ótip jatyr.
«Naýryz merekesi men 27 naýryz - halyqaralyq teatr kúnine oraılastyrylyp osymen 16 ret dástúrli festıval uıymdastyrylyp otyr. Bul shara - teatrdyń búgingi baǵyt-baǵdaryn anyqtaýǵa, repertýar saıasatyndaǵy ózindik izdenister men dramatýrgııa, rejıssýra, akter ónerine shabyt berip, olardyń jańa qyrynan tanylýyna múmkindik beredi», - deıdi atalǵan teatrdyń dırektory Esmuhan Obaev.
Sonymen qatar ol bıylǵy sharada akterlik sheberlikke asa mán beriletindigin jáne 5 atalym boıynsha marapattaý rásimi ótetindigin aıtyp ótti. Sondaı-aq mádenıetke qoldaý kórsetip, teatr jaıynda únemi jazyp júrgen jýrnalıster de marapatqa ilinetindigin jetkizdi.
«Bıyl Y.Noǵaıbaevtyń týylǵanyna 80 jyl tolady. Sol mereıli toıdyń betashary retinde osy festıvalmen bastap, kúzge qaraı teatrymyzda toıyn ótkizbekpiz. Ol kisi qazaq kınosynda, qazaq teledıdarynda, Áýezov teatryn álemdik deńgeıde tanytqan kórnekti akter», - dep atap ótti óz sózinde E. Obaev.
28 naýryzǵa deıin ótetin festıval repartýarynda "Abaı", "Eńlik-Kebek" tragedııasy, "Úılený", "Qylmyskerge kýálik", "Kúlemiz be, jylaımyz ba?" komedııalary bar. Kórermender qyzyǵyp kóretin bul qoıylymdardyń alǵashqysy ótken maýsymnyń premerasy bolsa, sońǵy tórteýi osy 85-maýsymnyń premeralary eken.
