Almatyda Teatr qaıratkerleri odaǵynyń «Eńlikgúl» syılyǵy kezekti ıelerin tapty
ALMATY. 27 naýryz. QazAqparat - Almatyda M. Áýezov atyndaǵy Qazaq memlekettik akademııalyq drama teatrynda respýblıkalyq «Eńlikgúl» teatr óneriniń kásibı syılyǵynyń marapattaý rásimi bolyp ótti.
Esterińizge sala ketsek, atalmysh syılyq 2010 jyldan beri 27 naýryz -Halyqaralyq teatr kúnine oraı, Qazaqstan Teatr qaıratkerleri odaǵynyń taǵaıyndaýymen berilip keledi. Syılyqtyń maqsaty men mindeti - halyqqa mádenı-rýhanı qyzmet etip, Qazaqstan sahna óneriniń damýyna zor úles qosyp júrgen ártister qaýymynyń arasynan úzdikterdi tańdap, marapattaý, sonymen qatar, sahnagerler ortasyndaǵy básekelestik rýhty arttyryp, teatr óneriniń órkendeýine yqpal jasaý bolyp tabylady.
Jyldyń eń úzdik rejısserinen bastap, eń úzdik jaryq berýshisine deıin anyqtaıtyn syılyq osymen úshinshi ret tabystalyp otyr. Bastapqy tórt atalymnyń qatary ulǵaıyp, onyń sany búginde 7-ge jetti. Bıylǵy baıqaýǵa elimizdiń memlekettik jáne jeke teatrlarynan 128 úmitker qatysty.
Ádil-qazylar alqasynyń ortaq sheshimi boıynsha, bıyl eń úzdik jyl aktery ataǵyna Jezqazǵan oblystyq Seráli Qojamqulov atyndaǵy mýzykalyq-drama teatrynyń akteri (Q.Ahmetovtyń «Aýǵan qasireti» spektaklindegi Marathan róli úshin) Ábilqasym Shomanuly ıe boldy. Al "Jyl aktrısasy" ataǵyna M.Áýezov atyndaǵy qazaq akademııalyq drama teatrynyń aktrısasy Dárııa Júsip («Tenderge túsken kelinshek» spektaklindegi Saǵıla róli úshin) laıyq dep tanyldy. "Eń úzdik jyl rejısseri" ataǵyna Ǵ.Músirepov atyndaǵy qazaq akademııalyq Balalar men jasóspirimder teatrynyń rejısseri Janat Hadjıev (Ǵ.Músirepovtyń «Qozy Kórpesh - Baıan sulý» qoıylymy úshin) ıe boldy. "Jyldyń operalyq, balettik partııasy" atalymyna Ońtústik Qazaqstan oblystyq opera jáne balet teatrynyń solısti Erlan Jandarbaı laıyq dep tabyldy. Al, "Jyldyń úzdik teatr sýretshisi" ataǵyna Q.Jandarbekov atyndaǵy qazaq mýzykalyq-drama teatrynyń sýretshisi Toǵaıbek Baıdarbekov ıe boldy. "Teatr ónerin damytýǵa qosqan úlesi úshin" syılyǵy Qaraǵandy oblystyq S.Seıfýllın atyndaǵy qazaq drama teatrynyń akteri Keńes Jumabekovke berildi. Ótken jyly tuńǵysh ret taǵaıyndalǵan "Qýyrshaq teatrynyń jyl ónerpazy" syılyǵy Memlekettik qýyrshaq teatrynyń aktrısasy Ulbosyn Momynjanovaǵa buıyrdy.
Basty syılyqtardan bólek, "Jyl dramatýrgy", "Jyldyń ozyq teatrtanýshylyq maqalasy", "Jyldyń ozyq teatr menedjeri", "Jyldyń ozyq mýzykalyq kórkemdeýshisi", "Jyldyń ozyq jaryq berýshisi" atalymdary boıynsha bes yntalandyrý syılyǵy tabystaldy.
"Eńlikgúl" syılyǵynyń barlyq ıegerleri arnaıy dıplomdarmen, sonymen qatar, sharanyń Bas demeýshisi "QazMunaıGaz" kompanııasynyń aqshalaı jáne baǵaly syılyqtarymen marapattaldy.
