Almatyda tájirıbeli qylmysker avtokólik tonaý ústinde ustaldy
ALMATY. 13 shilde. QazAqparat /Ádilet Musahaev/ - Almatyda tájirıbeli qylmysker avtokólik tonaý ústinde ustaldy. Almaty qalasy ІІD-niń baspasóz qyzmetiniń málimetinshe, Rýdnyıdyń 29 jastaǵy turǵyny buǵan deıin de urlyq pen toptasqan qaraqshylyq shabýyl jasaǵany úshin 3 ret sottalǵan.
Tártip saqshylarynyń paıymdaýynsha, tapa-taltúste qala ortalyǵyn torýyldaǵan ury jalǵyz áreket etpegen.
"Andreı óz jaqtastarymen birge Naýryzbaı batyr kóshesi boıyndaǵy turǵyn úıdiń biriniń alańynda turǵan «Toıota» kóligin nysanǵa alady. Kóliktiń ishinde áıel adam bolǵan. Urylar odan ári ózderiniń aldyn-ala oılastyrǵan rólderine enedi. Bireýi ótirik kóshe suraǵan bolyp, qurbanyn aldaı túsedi, osy ýaqytta ekinshisi 110 myń teńge, fotoapparat, uıaly telefon men túrli qujattar bolǵan sómkeni jymqyryp úlgeredi. Alaıda olardy baıqap qalǵan áıel kórshilerin kómekke shaqyrady. Kórshileri óz kezeginde polıtsııaǵa habarlasqan", -deıdi Almaty qalasy ІІD-niń sholǵynshy polıtsııa polkiniń komandıri polıtsııa podpolkovnıgi Nurjan Nurǵalıev.
Osy oqıǵa boıynsha birneshe sholǵynshy ekıpajy sol mekendi tekserýge kirisip ketedi. Kórshi alańnan tártip saqshylarynyń kóligin kórgen bette qobaljı bastaǵan kúdikti nazarǵa ilingen. Polıtseıler toqtaǵan bette qasha jónelgen kúdikti kóp uzamaı ustalǵan. Ol urlanǵan sómkeni ústindegi jeıdesine jasyrǵan.
"Qazir tergeýshiler onyń qasynda bolǵan basqa kúdiktilerdi izdestirýde. Sondaı-aq buryn sottalǵan ury uzaq ýaqyt boıy osyndaı jolmen aqsha taýyp kelgeni aıdan anyq", - dep atap ótti N.Nurǵalıev.
