Almatyda Tájikstan azamattarynan 900 gramnan astam geroın tárkilendi

Bul týraly búgin jýrnalıstermen bolǵan brıfıngte Іshki ister mınıstrliginiń resmı ókili Nurdildá Oraz málim etti.

«Almatynyń polıtsııa qyzmetkerleri arnaıy operatsııa ótkizip, 10,5 gramm geroındi satyp jatqan jerinen Tájikstannyń 29 jáne 45 jastaǵy eki azamatyn quryqtady. Olardyń jalǵa alyp turyp jatqan páterin tekserý kezinde 930 gramǵa jýyq  geroın tabylyp, tárkilendi. Esirtkini satý faktisi boıynsha qylmystyq is qozǵaldy, ustalǵan adamdar qamaýǵa alyndy»,-dedi resmı ókil.

Budan bólek, Ońtústik Qazaqstan oblysynyń polıtseıleri ІІM Esirtki bıznesine qarsy kúres komıtetiniń jáne arnaıy maqsattaǵy bóliminiń qyzmetkerlerimen birlesip, «Qyzyl tý» beketinde Saryaǵash qalasynyń turǵynyna tıesili «Mazda» avtomashınasyn toqtatqan. Avtokóliktiń salonyn tekserý kezinde 62 jastaǵy jolaýshynyń sómkesinen jalpy salmaǵy 12,5 keli gashısh salynyp, skotchpen oralǵan 11 túıinshek tabylyp, tárkilendi.                                                                                                                                                                                                                                                                                                                                                                                                                                                                                                                                                                                                                                                                                                                                                    

Ustalǵan er adam ýaqytsha ustaý abaqtysyna qamaldy. Tergeý amaldary júrgizilýde.