Almatyda taıaýda «Tsıfrlyq HQKO» ashylady

ASTANA. QazAqparat - «Azamattarǵa arnalǵan úkimet» memlekettik korporatsııasynyń basqarma tóraǵasy Abylaıhan Ospanov taıaýda Qazaqstan aýmaǵynda ashylatyn Halyqqa qyzmet kórsetý ortalyqtary jaıynda aıtyp berdi, dep habarlaıdy QazAqparat.

«Bıylǵy jyldyń basynda Astanada «Tsıfrlyq HQKO» jobasyn iske qostyq. Onyń maqsaty elektrondy qyzmetterdi kórsetý úlesin arttyrýǵa baǵyttalǵan. El azamattary «Tsıfrlyq HQKO» arqyly ótken kezde shyn máninde elektrondyq qyzmetter jeńil ekenin ári qolaıly bolyp otyrǵanyn túsinýde», - dep atap ótti A. Ospanov Úkimet úıindegi baspasóz máslıhatynda.
 

Memlekettik korporatsııanyń málimetine qaraǵanda, jaqynda Almaty qalasynda, keıin barlyq oblys ortalyqtarynda tsıfrlyq halyqqa qyzmet kórsetý ortalyqtary ashylady. Tsıfrlyq front-ofıste memlekettik qyzmetter tolyqtaı avtomatty túrde usynylyp, azamattar joǵary tehnologııalarǵa negizdelgen qurylǵylar arqyly qyzmetterge óz betinshe qol jetkizedi.

Abylaıhan Ospanov 2017 jyly mamandandyrylǵan HQKO-lar Kókshetaý men Semeı qalalarynda ashylǵanyn eske salyp ótti.

«Osy arqyly, búginde Qazaqstan boıynsha 14 mamandandyrylǵan halyqqa qyzmet kórsetý ortalyǵy, sondaı-aq sektorlar deńgeıinde taǵy eki mamandandyrylǵan HQKO jumys istep jatyr. Bıyl qosymsha osyndaı ortalyqtar Atyraý men Oral qalalarynda ashylady», - dep naqtylady ol.