Almatyda taýly aýdandarǵa jańa avtobýs baǵyttary ashylady
ALMATY. QazAqparat - Almatyda 10 shildeden bastap jańa avtobýs baǵyttary ashylady, dep habarlaıdy QazAqparat tilshisi.
Jańa baǵyttar qalaǵa qosylǵan eldimekenderdegi, sonyń ishinde taýly jerlerde turatyndardy qoǵamdyq kólikpen qamtamasyz etý maqsatynda ashylyp otyr.
Osy baǵytta jergilikti bıýdjet esebinen Evro-4 ekologııalyq standarttaǵy 45 dızeldi avtobýstar alynǵan edi. Jańa kólikter taýly aýdandardaǵy tar joldarda júrýge arnaıy jabdyqtalǵan.
Sonyń ishinde «Almatyelektrotrans» JShS-niń kommýnaldy kásipornyna LIAZ markaly 15 avtobýs berildi. 9,5 metrlik tómen edendi bul avtobýstar Evro-5 ekologııalyq standartyna saı, kondıtsıonerlermen, múgedekter úshin arnaıy kótergishtermen jabdyqtalǵan.
Jańa baǵyttar turǵyndar men ákimdikterden túsken ótinimderi negizinde jasaldy.
«10 shildeden bastap «Almatyelektrotrans» JShS jańa baǵyttar boıynsha kólik qozǵalysyn qamtamasyz etedi. Atap aıtqanda, №26 (Taýjoly - Qalqamandaǵy №7 emhana), №40 (Jumysshylar poselkesi - Maqataev kóshesi), №125 (Kókjıek - «Armada» saýda úıi) baǵytynda, 17 shildeden bastap №14 (Qaraǵaıly - «Barys-3» bazary), № 15 (Alataý sovhozy - «Altyn Orda» bazary) baǵytynda avtobýstar júre bastaıdy. Qujattardy daıyndaý jónindegi barlyq is-shara bitken soń 1 tamyzdan bastap №28 (Orbıta 2,4 - GES 2), №68 (Ál-Farabı dańǵyly - Remızovka saıajaılary) baǵyttar boıynsha avtobýstar qatynaıtyn bolady», - delingen qalalyq ákimdiktiń baspasóz qyzmeti taratqan aqparatta.
Aıta ketý kerek, Almaty ákimdigi jyl aıaǵyna deıin 300 zamanaýı jańa avtobýs satyp alý úshin 11,5 mlrd teńge bóldi.
