Almatyda Taýgúl yqsham aýdanyndaǵy jylý júıesi qalpyna keltirildi
ALMATY. QazAqparat - Taýgúl yqsham aýdanyndaǵy jylý magıstrali qalpyna keltirildi, dep habarlaıdy QazAqparat tilshisi.
«Almaty jylý júıesi» JShS-niń apatty joıý brıgadasy túnimen jóndeý jumystaryn júrgizgen. Aıta keteıik, Taýgúl yqsham aýdany aýmaǵyndaǵy Pıatnıskıı kóshesi men Áýezov aýdanyndaǵy Súıleımenov kósheleri astynan ótetin jylý magıstarlinde qubyrlar jarylǵan bolatyn.
Kommýnaldy qyzmet jumysshylary apatty joıý jumystary túnimen júrgizilgenin aıtty. Mamandardyń sózinshe, jańa qubyrlar aýystyrý jumystary jer astyndaǵy ózge de kommýnıkatsııa jelilerimen japsarlas jatqandyqtan qıynǵa soqqan.
«Qazirgi ýaqytta apatty joıý jumystaryna zamanaýı tehnıkalar qoldanylady, alaıda asyǵys jasaý óte qaýipti óıtkeni, ózge de jylý jelilierine zaqym kelýi yqtımal», - dedi qalalyq ákimdiktegiler.
Kommýnaldy apatty joıý jumystarynyń tez arada aıaqtalýy úshin Taýgúl yqsham aýdany boıynsha arnaıy jumys toby qurylǵan. Shtab jumysy Almaty qalasy ákiminiń orynbasary Almas Mádıevtiń baqylaýynda boldy.
Eske sala keteıik, Pıatnıtskıı men Súleımenov kósheleriniń qıylysyna jaqyn ornalasqan aýmaqta dıametri 500 mm bolatyn qubyr jarylǵan bolatyn. Osyǵan baılanysty 1300 nysan jylytý júıesinen ajyratyldy. Atap aıtqanda, Novaı, Jandosov, Beregovoı, Rysqulbekov kósheleri aýmaǵynda ornalasqan kópqabatty úıler men mekemeler jylýsyz qalyp, atalǵan aýmaqtaǵy mektep pen balabaqsha jumystaryn ýaqytsha toqtatty. Degenmen, saǵat 15-00-de jylý júıesin ózge júıege qosý arqyly turǵyn úılerge jylý berildi.
