Almatyda taýǵa shyqqan týrıstiń júregi toqtap qaldy

NUR-SULTAN. QazAqparat – Almatyda taýǵa kóterilgen er adam júrek talmasynan mert boldy, dep habarlaıdy QazAqparat qalalyq Tótenshe jaǵdaılar departamentine silteme jasap.

«7 tamyz kúni saǵat 11:15-de «109» tótenshe jaǵdaı qyzmetiniń qutqarýshylary Medeý aýdanyna («Kókjaılaýdan» 200 metr tómen) júrek ustamasy bolǵan 61 jastaǵy týrıstke kómek kórsetý úshin shaqyrtýǵa shyqty. 1740 metr bıikke shyǵýdyń qıyndyǵyna qaramastan, saǵat 12:30-da qutqarýshylar oqıǵa ornyna jetti. Qutqarýshylar 1960 jyly týǵan er adamnyń tynys almaı jatqanyn anyqtady. Saǵat 15:52-de qutqarýshylar er kisiniń denesin túsirip, polıtsııa qyzmetkerlerine tapsyrdy», - delingen habarlamada.

Aqparatta aıtylǵandaı, araǵa birer saǵat ótken soń taǵy birneshe adamnyń joǵalǵany týraly habar jetken.

«18:35-te TJD pýltine Bostandyq aýdanynda 16-21 jas aralyǵyndaǵy 4 adam, ıaǵnı qyz-kelinshekterdiń joǵalyp ketkeni týraly habarlama kelip tústi. Quramynda 5 adam jáne 1 tehnıka bar qutqarý qyzmeti olardyń mekenin anyqtady. Olar Almaarasan shatqalydaǵy jolda joǵalǵan adamdarmen baılanysqa shyqty. 19: 50-de qutqarýshylar joǵalǵandardy qarsy alyp, beketke deıin aman esen ótkizip jiberdi. Joǵalǵan qyz-kelinshekterge medıtsınalyq kómek qajet bolmady», - dep habarlaıdy TJD.

Osy oraıda Almaty qalasynyń TJD týrısterden taýly aımaqqa shyqqan kezde qaýipsizdik sharalaryn saqtaýdy suraıdy .

Taýdaǵy qarapaıym júris-turys erejeleri:

1. Taýǵa bararda óz kúshińizdi baǵytqa baılanysty durys esepteńiz. Daıyndyq deńgeıi boıynsha baǵytty tańdańyz.

2. Taýǵa barar aldynda jaqyndaryńyzǵa naqty baǵytty aıtyńyz. Týystaryńyz sizdi qaıda izdeý kerektigin bilýi kerek.

3. Taýlarda soqpaqtan shyqpańyz. Joldy qysqartýǵa tyryspańyz.

4. Eger baǵyt boıynsha kótirilý qıyndaǵan jaǵdaıda, artqa qaraı tómen túsińiz. Eń bastysy-oralý.

Qutqarý qyzmetiniń nómiri-109