Almatyda «Táýelsizdikke - tartý» atty óner festıvali uıymdastyryldy
ALMATY. 11jeltoqsan. QazAqparat - Jastar - bizdiń bolashaǵymyz. Olardyń kelesheginiń kemeldi bolýyna aǵa urpaq súıeý bolyp jatsa, bul úlken saýapty is.
Sonyń ishinde óner jolyn tańdaǵan jastardyń bıik belesterden kórinýine yqpal etetin baıqaýlar ótkizýde azamattyq tanytyp júrgen jandar az emes. Osyndaı bir ıgi shara keshe, 10 jeltoqsanda Almatyda uıymdastyryldy. Atap aıtqanda, jasóspirimderge arnalǵan áskerı-patrıottyq «Qazaqstan patrıoty» jýrnaly men Qazaq memlekettik Jambyl atyndaǵy fılarmonııasy birlesip «Táýelsizdikke - tartý» atty óner festıvalin ótkizdi.
Jas urpaqtyń boıyna otanshyldyq sezimin qalyptastyryp, týǵan el men jerge degen súıispenshiligin arttyrý maqsatynda ótkizilgen is-sharaǵa birqatar respýblıkalyq baıqaýlarda júlde alyp júrgen jasóspirimder qatysty. Jambyl atamyzdyń atyndaǵy qara shańyraqtyń kıeli sahnasy bir kún boıy áýezdi án, kúmbir kúı men qımyly kelisken kerbez bıge terbeldi.
Baıqaýǵa 4-10 synyp aralyǵyndaǵy 30-ǵa jýyq tańdaýly ónerpaz ben bıshiler ujymdary qatysty. El egemendiginiń 21 jyldyǵy qarsańynda uıymdastyrylǵan óner festıvali «Táýelsizdik kúni» merekesine jasalǵan tamasha tartý boldy deýge bolady.
Ónerpazdardyń bári osal emes. Sen tur, men aıtaıyn degendeı, jigerli jastardyń ándi, bıdi, kúıdi jan-tánimen berile oryndaǵandary erekshe súısintip, keshke jınalǵan qalyń kórermendi bir serpiltip tastady. Bir-birinen oza shapqan ónerpazdardyń ishinen has talantty anyqtaý qyraǵy qazylar alqasyna júkteldi. Onyń quramynda Qazaq memlekettik Jambyl atyndaǵy fılarmonııa dırektory, Qazaqstannyń eńbek sińirgen qaıratkeri, professor Muqtar Jamashuly Óteýov, kúıshi, óner zertteýshisi, QR Mádenıet qaıratkeri «Kókil» mektebiniń dırektory Abdýlhamıt Raıymbergenov, opera solısi, QR Eńbek sińirgen qaıratkeri Gúlzat Dáýirbaeva, Mádenıet qaıratkeri Shatyrhan Kerimbek, Respýblıkalyq qoǵamdyq-saıası «Prezıdent jáne Halyq» gazetiniń bas redaktory, QR Mádenıet qaıratkeri Marat Baıdildáuly Toqashbaev jáne «Qazaqstan patrıoty» jýrnalynyń bas redaktory Raýshan Karshalova boldy.
Saıys qorytyndysy boıynsha Abzal Jańabaı úzdik dep tanylyp, baıqaýdyń «Gran-Prı» júldesine ıe boldy. Al, birinshi oryn Symbat Kóshkinbaevaǵa buıyrdy. Eki ekinshi oryndy - Sholpan Faızolla men Raýan Bazarbaı aldy. Jáne de Aıdana Alaıdarova, Aqbota Úısinbekova, Saıa Isa úshinshi oryn ıegerleri atandy. Budan ózge fılarmonııa tarapynan taǵaıyndalǵan júldege Islam Sársenbek, Mádı Dáýlethan, Árken Nurhan qol jetkizdi. «Qazaqstan patrıoty» jýrnalynyń arnaıy júldesin Temirlan Erzatuly men Danııar Jandarbek qanjyǵasyna baılady.
2008 jyldan beri turaqty shyǵyp kele jatqan respýblıkalyq áskerı-patrıottyq «Qazaqstan patrıoty» jýrnaly búginde jas jetkinshekterimizdiń súıikti basylymyna aınaldy. Taralymy jyldan-jylǵa kóbeıe túsýde. Jýrnal mekteptermen, kolledjdermen, áskerı bólimdermen, patrıotshyl uıymdarmen tyǵyz jumys isteıdi.
