Almatyda «Táýelsizdik taǵylymy-30» atty fotokórme ashyldy
Kórmeni Qazaqstan avtorlar qoǵamy men QR Ulttyq kitaphanasynyń qoldaýymen «Fotoóner» qoǵamdyq birlestigi uıymdastyrǵan. Shara Táýelsizdiktiń 30 jyldyǵyna arnalady.
Kórmege elimizdiń egemendik alǵannan bergi tarıhı oqıǵalardy, ulttyq salt-dástúrdi, óńirlerdegi tirshilikti nazardan qalt jibermegen úzdik fotojýrnalısterdiń týyndylary qoıyldy.
Sharanyń maqsaty – egemen el retindegi otyz jyl ishinde fotosýretshilerdiń obektıvterine ilingen memlekettik, qoǵamdyq, saıası jáne rýhanı mańyzy bar sátter men oqıǵalardy keler urpaqqa shejire túrinde qaldyrý.
Fotokórmege usynylǵan árbir qundy sýretten halqymyzdyń azattyq alǵan jyldaǵy «aq túıeniń qarny jarylǵan» qýanyshynan bastap, ony qalyptastyrýdaǵy san qatparly jumystar men sezimdi selt etkizer sátterdi kórermen bir kúnde tamashalap shyǵýyna bolady.
Kórmede kelýshiler nazaryna usynylǵan 100-ge jýyq týyndynyń avtorlary qatarynda qazaqstandyq fotografııanyń abyz tulǵalary sanalatyn Iosıf Býdnevıch, Rahymbaı Hanaly, Murat Mámbetov, Nurǵoja Jubanov, Júnisbek Paıyzov, Sıez Básibekov, Qaırat Mustafın, Denderbaı Egizov, Saılaý Pernebaev, Qalıǵumar Qabdeshuly, Anatolıı Ýstınenko, Esimhan Orynbaev, Bolat Omarálıev, Nurmanbet Qızatuly, Jaqsylyq Turlybekov, Aleksandr Pavskıı, Shúkir Shahaı, ıÝrıı Bekker, Aıtjan Murzanov, Farhad Qabdyqaıyrov jáne búgingi jas býyn ókilderinen Erlan Omarov, Jeńis Ysqabaı, Maqsat Shaǵyrbaı jáne taǵy basqa talantty azamattar bar.
