Almatyda Táýelsizdik kúnine oraı merekelik otshashý bolady

ALMATY. QazAqparat - Almatyda 16 jeltoqsan kúni Táýelsizdiktiń 30 jyldyǵyna arnalǵan merekelik otshashý bolady. Bul týraly qalalyq mádenıet basqarmasy málim etti, dep habarlaıdy QazAqparat tilshisi.

Almaty qalalyq mádenıet basqarmasynyń málimetinshe, merekelik otshashý «Astana» alańynan (QBTÝ ǵımaratyna qarama-qarsy) saǵat 21.00-de bastalady.

Qala ákimdigi mereıtoı kúnine oraı Almatyda 110-nan astam túrli is-sharalar ótkiziletini týraly habarlady.

Mysaly, 15 jeltoqsanda №1 Oqýshylar úıinde «Jasa, qazaq eli» kontserti ótedi, sol kúni N. Sats atyndaǵy memlekettik akademııalyq orys balalar men jasóspirimder teatrynda mádenıet jáne óner ókilderiniń qatysýymen «Táýelsizdik ıgiligi úshin eńbek» atty is-shara uıymdastyrylady, sonymen qatar, Saıran kóliniń jaǵasynda jastardyń qatysýymen eko-aktsııa ótedi.

16 jeltoqsanda «Turan» ýnıversıteti fleshmob uıymdastyrady, al Abaı atyndaǵy memlekettik opera jáne balet teatrynda «Abylaı han» operasynyń premerasy kórsetiledi.

Táýelsizdik kúni QR Ulttyq kitaphanasynda «Tuǵyry bıik Táýelsizdik» atty is-shara ótedi.