Almatyda taýdan tabylǵan áıeldiń denesi kimdiki ekeni belgisiz - TJK
ALMATY. QazAqparat – Tótenshe jaǵdaılar komıteti Almaty taýlarynan tabylǵan áıel denesine qatysty túsinik berdi, dep habarlaıdy QazAqparat tilshisi.
Munyń aldynda qalalyq tótenshe jaǵdaılar departamenti máıittiń Ásel Panarǵalıeva ekenin rastaǵan bolatyn.
«Áser Panarǵalıevaǵa qatysty aıtarymyz, taýdan bir áıeldiń denesi tabyldy. Alaıda ol Ásel me, álde basqa áıel me - tap basyp aıta almaımyz. Tek tuspaldap qana aıta alamyz. Qazir tergeý jumystary júrip jatyr», - dedi TJK baspasóz qyzmetinen.
Áıeldiń denesi Úlken Almaty kóliniń qasyndaǵy Kosmostansadan tabylǵan. Qazir polıtsııa qyzdyń neden qaıtys bolǵanyn anyqtaý úshin sot-medıtsınalyq saraptama taǵaıyndady.
Aıta ketý kerek, 26 jastaǵy qyzdyń joǵalǵany 10 qarasha kúni belgili boldy. Ol taý týrızmimen aınalysyp júrgen. 9 qarasha saǵat 13:00 shamasynda ol Úlken Almaty (Josaly) kólinde túsken fotosyn áleýmettik jelige jarııalaǵan. Odan keıin baılanysqa shyqpaǵan. Qyzdyń 9 qarasha kúni Kosmostansa aýdanynda taýdan túsip kele jatqanyn adamdar kórgen.
Іzdestirý jumystary eshqandaı nátıje bermegen soń Ásel Panarǵalıevanyń týystary ol týraly kez kelgen aqparatqa aqshalaı syıaqy beriletinin jarııalady.
Eske salaıyq, byltyr 19 tamyzda osyǵan uqsas qaıǵyly jaǵdaı bolǵan edi. Qazaqstandyq 3 alpınıst Murat Ótepbaev, Andreı Korneev jáne Aleksandr Chechýlın Qyrǵyzstandaǵy Tıan-Shan taýynda iz-túzsiz joǵalyp ketken. Bul týraly qala ákimi Baqytjan Saǵyntaev paraqshasynda jazdy.
23 tamyzda aýa raıynyń qolaısyzdyǵy men kóshkin qaýpine baılanysty qutqarý komandasy alpınısterdi izdeýdi toqtatqan bolatyn.
